Мьянманың Президентизи Мин Аун Хлайн Тывага аалдап кээп чораан

Мьянманың Президентизи Мин Аунг Хлайн Тывага албан-езузу-биле август 22-де кээп чораанының дугайында Тываның Баштыңы [id360104045|Владислав Ховалыг] соцчеткилерде бодунуң блогунда дыңнаткан.

Тываның Баштыңының медеглээни-биле алырга, бо аян-чорук Россияның Президентизи Владимир Путин биле Беларусьтуң Президентизи Александр Лукашенко-биле ужуражылгаларның соонда, делегей чергелиг улуг программаның бир кезээ болур. Чурттуң Баштыңы мооң мурнунда, Мин Аун Хлайн Россияда сарыг шажые төптериниң бирээзи Тываже аян-чорукчулап баар деп турарын дыңнаткан.

Аалчы Кызылдың аэропортундан дорт Тываның чазаанче чорупкаш, аңаа ажыл-агыйжы ужуражылгага киришкен. Владислав Ховалыг бодунуң блогунда Россияның Президентизиниң Россия биле Мьянманың аразында кады эштежилгени болгаш удур-дедир деткимчени хөгжүдер талазы-биле угланыышкыны езугаар, амгы Тываның экономиктиг күчү-шыдалын Мин Аун Хлайнга таныштырып, ол ышкаш Россияның составында аныяк республиканың тургустунган төөгүзүн үлешкен.

Владислав Ховалыг хүндүлүг аалчыга Мьянмадан делегациязының идепкейлиг киришкени делегей чергелиг IV сарыг шажын шуулган Кызылга чүгле ийи хонук бурунгаар доозулганын дыңнаткан. «Тыва черге аалчыларывысты, чаңгыс чер чурттугларыңарны уткуп алганывыска сеткиливис ханызындан өөрүп тур бис» – деп, Тываның Баштыңы демдеглээн.

Тываның Баштыңы ужуражылга шажын харылзааларындан аңгыда өске-даа угланыышкыннарга кады ажылдажылганы калбартырынга бүзүрелин илереткен. «Туризм адырынга төлевилелдерни боттандырып, культура солчулгазын күштелдирер болгаш ачы-дузалыг кады ажылдажылгага болур хире төлевилелдерни сайгарып чугаалажырынга белен бис» – деп, ол демдеглээн. Мин Аун Хлайнның Тывага аалдап келгени, даштыкы күрүне удуртукчузунуң республиканың төөгүзүнде үшкү аян-чоруу болганын Владислав Ховалыг демдеглээн. «Ооң мурнунда республикага Моол Арат Республиканың удуртукчузу Юмжагийн Цеденбал база Монако хааны Альбер II аалдап кээп чорааннар» – деп, ол бодунуң блогунда бижээн.

Владимир Путин Москвага чугаалажыышкыннар үезинде, Мьянманың удуртукчузун Россияның өңнүү деп адаанын сагындыраал. Чурттар аразында найыралдың, эштежилгениң болгаш бот-боттарын деткижериниң быжыг, үе-биле хынаттынган харылзаалары сайзыраанын ол демдеглээш, албан езузу-биле келген аалчыны хүлээп алыр аргалыг болганынга өөрүп турарын илереткен.

1948 чылда Россия биле Мьянманың аразында харылзаа тургустунган болгаш оон бээр-ле доктаамал хөгжүп турар. Сөөлгү чылдарда олар онза бүзүрелдиг хамаарылгалыг апарган. Чурттарның аразында быжыг саң-хөө харылзаазы тургустунган, садыглажылгаларның үштүң ийи кезии рубль-биле чоруп турар. Ийи удуртукчу камгалал адырында шериг болгаш шериг-техниктиг кады ажылдажылганы, ооң перспективаларын сайгарган.