Тываның найысылалында «Тыва кавай» төлевилел-биле тудуг ажылдары доозулган. Н. Гастелло аттыг национал культура болгаш дыштанылга парыгының девискээринге боттандырган төлевилел 2024 чылда таарымчалыг хоорай хүрээлеңин хевирлээр эң эки эгелээшкиннериниң IX бүгү-российжи мөөрейиниң тиилекчилериниң бирээзи болганын сагындыраал. «Чурттаар оран-сава болгаш хоорай хүрээлеңи» национал төлевилелдиң «Таарымчалыг хоорай хүрээлеңин хевирлээри» федералдыг программа-биле мөөрейни эрттирген.
Чоокта чаа ук объектиде доозулган ажылдарны албан езузу-биле дамчыткан. Национал парктың директору Дмитрий Хертек чыылган аалчыларны уткуп, ажылды кылган «Угулза» кызыгаарлаан харыысалгалыг ниитилелдиң тудуг черинге четтиргенин илереткен. Амгы үениң хоорай хүрээлеңин хөгжүдеринге бо төлевилелдиң ужур-утказын ол демдеглээн.
«Тыва кавай» төлевилели-биле парктың чөөн талазын чаагайжыткан. Ажылдың сорулгазы – парктың чайгаар бүткен бойдус чаражын үревейн, Тываның национал болгаш культурлуг онзагайларын төлевилел таварыштыр көргүзери.
Тыва кавай – Национал парктың онзагай бойдузун кадагалап арттырган амгы үениң, таарымчалыг, экологтуг арыг девискээри болур. Ол девискээрни элээн каш девискээрге чарган. Төп шөлде чемненир черлер (фуд-корт болгаш кафе), фонтан, одаг кыпсыр чер, дыштаныр черлер, арт-объект болгаш чадаг-терге тургузар чер бар. Хем кыдыында база доктаамнарны болгаш кирер черни каастап кылган. Ойнаар шөлде шимченгир оюннар ойнаар аңгы-аңгы чүүлдерни салган. Ол бүгүнү амгы үениң овур-хевири-биле тыважыдыр кылган.
Чаартынган болгаш чаагайжыттынган парк регионнуң чугула культура-дыштанылга төвү апарып, республиканың чурттакчыларын болгаш аалчыларын хаара тудар ужурлуг деп, төлевилелдиң авторлары санап турар. 2028 чылда Н. Гастелло аттыг Национал парк тургустунганындан бээр 100 чыл оюн демдеглээр. Юбилейлиг болуушкунга белеткел ажылдары чоруп турар. Паркта «Тыва кавайны» тутканы үениң негелделеринге дүгжүп турар аянныг, чараш шөлге аалчыларын уткуп алыр арганы берген.
Россияның Президентизи Владимир Путинниң эгелээшкини-биле 2018 чылдан бээр, биче хоорайларга болгаш төөгүлүг чурттакчылыг черлерге таарымчалыг хоорай хүрээлеңин тудар төлевилелдерниң бүгү-российжи мөөрейи эрттирип турар. Мөөрейниң тиилекчилери төлевилелдерин боттандырары-биле 50 сая рубль чедир федералдыг деткимчени ап турар. Кызылда Национал парктың девискээрин чаагайжыдар төлевилел 100 ажыг сая рубльдиң грантызын алган.
