Сут-Хөл кожууннуң төвү Суг-Аксындан Марьяна Монгуш социал керээге үндезилээн күрүне деткимчезин алгаш, даараныр черни ажыдып алганын кожууннуң Чонну ажылга хаара тудар төвү дыңнаткан.
Эгелеп чоруур сайгарлыкчы хөй ажы-төлдүг ава. Ол башкы мергежилдиг. Шевер ооң мурнунда өг-бүлезинге, эш-өөрүнге, таныш-көрүжүнге национал хепти даарап турган.
Дааранырынга ынак ава эрткен чылын кожууннуң Чонну ажылга хаара тудар төвүнче документилерин дужаап, комиссияга төлевилелин ажыктыын тайылбырлап, шынзыдып шыдаан.
Марьяна Монгуш күрүне деткимчезин алгаш бүдүрүлгеге ажыглаар даараныр машиналар, пөстүң кескен чериниң кыдыгларын даараар машина, бус-биле хеп базар генератор, аскыыштар дээш оон-даа өске херекселдерни садып алгаш, ажыл-херээн эгелээн.
Шевер тыва бөрттер, тоннар, чеңи чоктар, национал аян-биле даараан эр, кыс хептерни даарап турар.
Национал хепти кедип алырга, кижи каас-шиник, чоргаар көстүр. Амгы үеде эр-даа, херээжен-даа улус тыва хевинче улуг сонуургалдыг болуп, байыр-найырда кедип турар апарган.
Күрүне деткимчезиниң ачызында Сүт-Хөлде ажыл-биле бот-хандыртынган сайгарлыкчыларның саны чыл келген тудум немежип турар.