Национал музей “Россия” делгелге-шуулганынга Тываныңкол чедиишкиннерин көргүзер

Ноябрьның 4-те, Москвада улусчу ажыл-агый чедиишкиннериниң делгелгезинге делегей чергелиг “Россия” делгелге-шуулган бодунуң ажылын эгелээр.

Россия Федерациязының шупту субъектилери бүдүн чурттуң байлаа апарган регионунуң кол чедиишкиннерин көргүскен экспозицияларны делгелгеге делгээр. Алдан-Маадыр аттыг Национал музей Тыва Республиканың этнография кезээниң шөлүнге экспонаттарны белеткээр.

Тываның Баштыңы Владислав Ховалыг тыва экспозицияны организастаар оргкомитеттиң мурнунга республиканы калбаа-биле көргүзер даалганы берген. Владислав Ховалыгның бодалы-биле алырга, экспозиция хары угда ханы уткалыг боорда, чаа чүүлдерлиг болур ужурлуг. Ооң-биле чергелештир республиканың бүгү чедиишкиннерин база шупту күчү-шыдалын тодаргай көргүзер.

Эксперттериң бодалы-биле алырга, республика туризм болгаш культура талазы-биле шыырак. Фото болгаш видео материалдар, экспонаттар, ол ышкаш интерактив дузазы-биле бистиң республиканың бүгү-ле магаданчыг чүүлдерин көргүзер херек: эгээртинмес төөгүзүн, амгы чедиишкиннерин база регионну Моол база Кыдат-биле харылзаштырар автомобиль болгаш демир-орук оруун тудар инфраструктура төлевилелдери-биле холбаалыг бурунгаар келир базымнарны таныштырар.

Национал музейниң коллективи Тываны бараалгадыр ындыг улуг төлевилелге боттарының киржирин база этнографтыг композияны белеткээрин алдар деп санап турар. Музейниң шеверлери тыва өгнүң дериг-херекселдерин болгаш ооң эдилелдерин ыяштан кылып эгелээн. Музей чамдык эдилелдерни алгы-кеш мастерлеринде база ус-дарганнарда чагаан.

Өг чанынга хептээн тыва аъттың дүрзүзү, чуктан шуткаан эр, херээжен база бичии кижи дүрзүлери, Азия төвү скульптура композициязының бичелеткен хевири туруптар.

– Бистиң сорулгавыс – Тыва Республиканың төөгүзүн болгаш этнографиязын долу көргүзери. Бистиң эгээртинмес чуртувустуң, ниити российжи культураның бир кезээ болур амгы Тываны таныштырары болуп турар. Делгээр 230 чүүлдерниң 170 хирезин белеткеп алган бис – деп, музейниң директору Каадыр-оол Бичелдей тус черниң журналистеринге дыңнаткан.

Музейниң ажылдакчылары делгелге болур черже чорудар чүүлдерниң белеткелин октябрь 10-га чедир доозар деп планнаан. Оон эт-херекселдерни хаптаарынга беш хонук үнер, а октябрьның 15-те чурттуң төвүнче автотранспорт-биле экспонаттарны чорудар.

Делгелге үезинде культура-хөглээшкинниг, өөредиглиг болгаш ажыл-агыйжы программалар база болур. Регион этнографтыг экспозициядан аңгыда, инвестиция төлевилелдериниң, культураның, ында чурттап турар чоннарның үндезин аъш-чеминиң темалыг өске-даа шөлчүгештеринге, ярмаркага бодун таныштырар. Делгелгени сонуургап келген кижилер чуртуң аңгы-аңгы булуңнарындан суй-белек кылыгларын көрүп, садып алыр аргалыг.

Суй-белектер продукциязын моон ам-даа садып ап болур. Тываның үндезин культуразының үш шевери: тыва тоннар даараар Чойган Намжайның, тыва сыртыктар болгаш шай, дус хаптары даараар Эльвира Ооржактың, тыва аптаралар чазап кылыр Адыгжы Монгуштуң ажылдарын делгелгениң https://russia.ru/ сайтызындан бөгүн көрүп болур.

Тыва мастерлерниң ажылдары улуг хемчег төнгүжеге чедир Тыва Республиканың делгелге шөлдерин каастаар. 2023 чылдың ноябрь 4-тен 2024 чылдың апрель 12-ге чедир «Россия» делгелгени көрүп болур.