Национал музейде «Совет Тыва» делгелгени ажыткан

Тываның Алдан-Маадыр аттыг Национал музейинге ССРЭ-ниӊ хүрээлеӊинге Тыва Арат Республиканыӊ эки тура-биле бактаап киргениниӊ 80 чылдаанынга тураскааткан «Совет Тыва» делгелгениң ажыдыышкыны болуп эрткен. Ында Тываның совет үеде ниитилел-политиктиг, социал-экономиктиг болгаш культурлуг сайзыралын көргүскен.

Национал музейниң директору Каадыр-оол Бичелдей, ТР-ниң Дээди Хуралының даргазы Кан-оол Даваа, Күрүне Думазының депутады Анжелика Глазкова делгелгениң ажыдыышкынынга киришкен.

Күрүне Думазының депутады Ада-чурттуң Улуг дайынының үезинде тыва чон эрес-дидимин, дузааргаан, энерел сеткилдин көргүзүп, Тиилелгени чоокшулаштырар дээш, улуг үлүг-хуузун кииргенин онзалап демдеглээн. "Дайын үезинде бүгү совет чон төрээн чуртун камгалаар дээш демиселче көдүрлүп үнгеш, Улуг тиилелгени чедип алган. Ам база кады дем-биле шак ындыг тиилелгени чедип алыр бис» – деп, Анжелика Глазкова байыр чедирип тургаш, чугаалаан.

ССРЭ-ниң Дээди Совединиң Президиумунуң 1944 чылдың октябрь 11-де 528/3 дугаарлыг чарлыы-биле Совет Социалистиг Республикалар Эвилелиниң составынче Тыва Арат Республиканы хүлээп алган. Тыва Арат Республиканың ажылчы чонунуң Биче Хуралының дилээнге даянгаш, Совет Социалистиг Республикалар Эвилелиниң составынче киирер дугайында шиитпир үнген.

Музей ажылдакчызы Пильжум Раджунуң чугаазы-биле алырга, октябрь 11-ниң хүнү – Тываның төөгүзүнде балалбас арын болуп арткан хүн. Национал музейде «Совет Тыва» деп делгелгеде ТАРП ТК бирги секретары, генерал-лейтенант С. К-Х. Токаның орден-медальдарын, хевин болгаш оон-даа өске төөгүлүг экспонаттарнны көргүскен.

Тыва улустуң аас чогаалынга үндезилеттинип тургустунган «Тыва» бөлүү аян туткан.

#Националмузей #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews