Национал ном саӊы биобиблиографтыг айтыкчыны белеткеп үндурген

А. С. Пушкин аттыг Национал ном саӊыныӊ национал болгаш чурт-шинчилел чогаалының килдизи Маадыр-оол Ховалыгныӊ 75 харлаан юбилейи таварыштыр биобиблиографтыг айтыкчыны белеткеп үндурген.

Айтыкчыныӊ эгезинде филология эртемнериниӊ кандидады, очулдурукчу, чечен-чогаал шинчилекчизи С. С. Комбу, М. Б. Ховалыгныӊ чогаадыкчы ажыл-чорудулгазын, чогаалчыныӊ альпинизм талазы-биле салым-чаяаныныӊ дугайында РФ-тиӊ болгаш ТР-ниӊ күш-культуразыныӊ тергиини, альпинизмниӊ спорт мастериниӊ кандидады М. К. Кыргыс бижээн.

Библиографтыг айтыкчы чеди кезектен тургустунган:
I. Маадыр-оол Ховалыг – прозачы.
II. Турист, альпинист, рекордчу.
III. Ховалыг М. Б. – Тываныӊ Улустуӊ чогаалчызы.
IV. Альпинист.
V. Чогаал шинчилээн болгаш публицистика статьялары.
VI. Очулдурукчу.
VII. Намдары болгаш чогаадыкчы ажыл-чурудулгазы.

Айтыкчыда чогаалчыныӊ 1986-2020 чылдарда бижээн ажылдары кирген.

Маадыр-оол Бартыштаанович Ховалыг – прозачы, очулдурукчу, публицист, альпинист, хөй-ниитичи, Тываның улустуң чогаалчызы, республикада дың чаңгыс-ла “Тываның ирбижи” аттың эдилекчизи.

М. Б. Ховалыг – “Меңгилиг бедиктерниң кыйгызы”, “Хаяда хадыңнар”, “Улуг от”, “Ыдыктаан тук”, “Делегей шыпшыында тывалар” болгаш өске-даа номнарның автору. Ол Тыва Республикада альпинизм, делегейниң шыпшыктарынче шургуп үнер бедик тура-сорук талазы-биле бирги чергеде турар, кайгамчык шыдамык, соруккур кижи.

2006 чылда бедиктер үнер бирги тыва экспедицияны тургускаш, Ленин база Памир шыпшыктарынче үнүүшкүннерни организастаан. 2008 чылда М. Б. Ховалыг баштаан бөлүк альпинистер Африканың шыпшыы – Килиманджаро (5895), чартык чыл болгаш Мурнуу Африкада Аконкагуа (6962 м), 2010 чылда делегейниң эң берге бедиктерини Соңгу Американың Аляскада Мак-Кинли – Денали (6194 м.), 2011 чылдың кыжынында Австралияның Косцюшко (2228 м.) бедиинге, а ол-ла чылдың күзүнүнде Европаның Эльбрус (5642 м.) шыпшыынга турган. 2012 чылда М. Б. Ховалыг бодунуң командазы-биле Азияның 6400 м. бедик шыпшыы – Эверестти (8848 м.) Тибет талазындан чаалап алганнар.

Маадыр-оол Ховалыгның «Ыдыктаан тук» деп чогаалын Тываның школаларының сески классчылары өөренип турарлар. Маадыр деп адынга ёзулуг төлептиг, аныяктарга үлегерлиг дагдыныкчы.

#Пушкинаттыгнационалномсаӊы #Биобиблиографтыгайтыкчы #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews