Тывада 140 хире кижи чаа квартираларынче көжүп кирер. Эргижирээн болгаш чурттаары айыылдыг оран-савадан хамаатыларны көжүреринге 2022-2023 чылда 213 сая ажыг рубльди тускайлаан. «Чуртталга оран-савазы база хоорай хүрээлели» национал төлевилел-биле республиканың чурттакчылары чаа бажыңынарже көжер.
Чуртталга-коммунал ажыл-агыйын эде чаартырын кады деткиир фонд – күрүне корпорациязының баштаар чери бо чылдың март 18-те, «Чурттаары таарымча чок чуртталга фондузун эвээжедирин хандырары» федералдыг төлевилел боттаныышкыны-биле саң-хөө деткимчезин бээрин дилээн Тыва Республиканың чагыын деткээн. РФ-тиң субъектилеринде ол төлевилел ажылы-биле, 2017 чылдың январь 1-ге чедир аварийлиг деп санаан бажыңнардан, хамаатыларны өскээр көжүрүп турарын сагындыраал.
Тыва ол чагыы езугаар Чуртталга-коммунал ажыл-агый фондузундан 213,68 сая рубльди алыр, а регион бюджединден 2,17 сая рубльди кады акшаландырар. Ол акша-хөреңги-биле келир чылын Чеди-Хөл кожууннуң Хову-Аксы суурга 2,26 муң дөрбелчин метр ниити шөлдүг 50 чурттаар оран-саваны тудар. 138 хамааты ол бажыңнардан чаа квартираларны алыр.
Эрткен чылдың октябрьда Тываның Баштыңы Владислав Ховалыг күрүне корпорациязының баштаар чериниң даргазы – чиңгине директор Константин Цицин-биле ужурашкан. Ынчан ол республикага ук программаның боттаныышкынын чедип алырынга херек акша-хөреңгини аңгылап бээрин Чуртталга-коммунал ажыл-агый фондузу-биле дугуржуп алган. Ол ышкаш фондунуң өске-даа угланыышкынарында – социал чуртталга тудуунда, коммунал инфраструктура эде чаартылгазында кады идепкейлиг ажылдап турар. Республиканың беш муң ажыг чурттакчылары чаа, таарымчалыг квартираларын алганын сагындыраал.
