Национал төлевилел күүселдези-биле суггат системаларын катап тургузуп турар

Тывада суггарылга системаларын катап тургузарының кампаниязы уламчылавышаан. Бо чылын үш кожуунда ажылдар чоруп турар. Чеди-Хөлде тараачын-арат ажыл-агыйының даргазы Хеймер-оол Кыргыс Элегестиң суггарылга системазын чаартыр ажылды холда алган.

Объектиде сес техникалыг, 28 кижилиг үш бригада ажылды март айда эгелээн. Кол суг оруун арыглап аштаар чер ажылдары чоруп турар. Хемниң унун дуглап, өскээр чайган, буга оруун арыглаан. Кирер оруктарны эптиг кылдыр арыглаан.

Барыын-Хемчикте Олеся Монгуштуң баштааны тараачын-арат ажыл-агыйы Шекпээрниң суг бугазын эде чаартып турар. Каа-Хем кожуунда база-ла тарачын ажыл-агыйның удуртукчу Кудай-Мерген Монгуш Бүрен-Хем системазын ажылдадыры-биле ажылдап кирипкен.

Тывада 49 суггарылга системазы бар. Республика сөөлгү каш чылдарда «Агроүлетпүр продукциязының экспорту» национал төлевилел күүселдези-биле оларны катап тургузарынга идепкейлиг киржип келген. Чүгле 2023 чылда Бии-Хем, Таңды, Чаа-Хөл база Чеди-Хөл кожууннарда суггарылга системаларын чаартып кылган, ооң ачызында үш муң ажыг тараачын-арат ажыл-агый шөлдери ажыглалче эглип келген.

Тывага тараачын-арат ажыл-агый черлериниң суггарылгазы – дүжүт алырының кол магадылалының бирээзи, ынчалза-даа суггаттыг черлерниң чүгле 25 хире хуузун херек кырында суггарып турар.

Регионга Президент Владимир Путин кээп чорда, Тываның Баштыңы Владислав Ховалыг ужурашкаш, тус черниң суггарылга системаларының байдалының болгаш оларны катап тургузарының чугулазын чугаалаанын сагындыраал.