Тыва аварийлиг чуртталга бажыңнарындан хамаатыларны өскээр көжүрер планны мурнады боттандырып турар. ТР-ниң Тудуг яамызы чурттаарынга таарымча чок чуртталга фондузун кызырар дээн регионалдыг төлевилелдиң акшаландырыышкын түңүн улгаттырарын чедип алыр бодалдыг.
РФ-тиң Чазаанда тудуг адырының куратору, Чазак Даргазының оралакчызы Марат Хуснуллинге ооң дугайында бижикти чоруткан турган. Тываның мурнунга салган аварийлиг чуртталга бажыңнарындан хамаатыларны өскээр көжүрер талазы-биле планны ажыр күүсеткени-биле ындыг эгелээшкинни тыва тудугжулар киирген.
“Чурттаарынга таарымча чок чуртталга фондузун чоорту эвээжедирин хандырары” программада киржикчи Кызыл хоорай, Каа-Хем база Хову-Аксы суурлардан 719 чурттакчының 144-ү 2019-2022 чылда чаа тудуглардан квартираларны алган. 2023 чылда Кызыл биле Каа-Хемде программа бүрүн күүсеттинер.
Ноябрь 16-ның байдалы-биле алырга, Хову-Аксында 639 программа киржикчизиниң 139-зунга чаа бажыңнарны берген. 2025 чылга чедир суурнуң 460 чурттакчызын чурттаар чер-биле хандырып, программаны доозар ужурлуг. Бо хүннерде хөй аалдыг үш бажыңны тудуп турар. Бо чоокку үеде 107 кижи чаа бажыңнарже көжер ужурлуг, ындыг болзажок бо хүнде тудугжуларга ам-даа 539 сая рубль херек.
“Чурттаарынга таарымча чок чуртталга фондузун чоорту эвээжедирин хандырары” программа «Чурттаар чер болгаш хоорай хүрээлеңи» национал төлевилелде кирип турар. 2017 чылдың январь 1-ге чедир аварийлиг деп санаттынган чуртталга бажыңнарын ол программа-биле көжүрери көрдүнген.
Тыва 2025 чылда ол программаны доозар. Көжүрер ужурлуг хөй аалдыг 21 бажыңның орнунга ол программа күүселдези-биле 12 муң дөрбелчин метр шөлдүг чаа бажыңнарны тудар.
Национал төлевилелдиң программазын мурнады боттандырып турар
21 ноября 2023
37