Бо шакта Улусчу чогаадылга бажыңында Чоннуң чаңгыс деминиң хүнүнге тураскааткан «Найырал» национал культуралар фестивалының түңнел чадазы эртип турар.
Чаӊгыс күрүнеде бир демниг болгаш эп-найыралдыг амыдырап чурттап турар национал чоннарныӊ культураларын бараалгадып көргүзер сорулгалыг фестивальга 400 хире школачы киржип келген. Олар чон бүрүзүнүң ажыл-амыдыралын, культуразын ханызы-биле шинчилеп турган.
“Баштайгыларның шимчээшкини” уруглар болгаш аныяктарның бүгү-российжи шимчээшкининиң регионда салбырының чогаадылга талазы-биле төлевилелдер удуртукчузу Аржаана Суктерниң дыңнадып турары-биле алырга, школачылар аразынга фестивальдың муниципалдыг чадазынга республиканың аңгы-аңгы булуңнарындан 1600 хире уруг киришкен. «Бөгүн фестивальдың түңнел чадазында 400 хире өөреникчи киржип келген. Олар шилип алган чонунуң культуразын, төөгүзүн таныштырар. Тиилекчилерге электри гитаралар болгаш хөгжүм херекселдерин тыпсып, шаңнап-мактаар» – деп, Аржаана Суктер чугаалаан.
Национал культуралар фестивалын ТР-ниң Культура яамызының база ТР-ниң Националдар херектериниң талазы-биле агентилелиниң деткимчези-биле эртип турар. Культурлуг хемчег 2024 чылда 1343, 2025 чылда 1596 уругну хаара туткан.
“Баштайгыларның шимчээшкининиң” төлээзи Александр Кардополов фестивальда республиканың барык шупту кожууннарының школалары киржип келгенин дыңнадып, уруглар боттарының артисчи чоруу-биле хамыкты кайгадып турарын онзалап демдеглээн.
Улуг-Хемниң, Бии-Хемниң, Сүт-Хөлдүң, Тес-Хемниң, Чөөн-Хемчиктиң командалары ширээ сыңмас якут, узбек, татар, бурят национал аъш-чемни делгээн.
«Найырал» фестивалы – дылга, хөгжүмге, оюнга хүндүткелди кижизидип турар болгаш улустарга аңгы-аңгы нацияның база чоннарның, оларның культуразынга сонуургалды оттуруп турар ада-чуртчу байырлал.
Чуруктарны Буян Ооржак тырттырган