Тываның Кадык камгалал яамызы чурттакчы чонга шынарлыг эмчи дузазының чедирилгезин экижидер хемчеглерни ап чорудуп турар.
Чаа өөредилге чылының эгелээни-биле чергелештир, Кызылдың чеди школазында диш эмнээр кабинеттер ажыттынган. Чаа ажыткан кабинеттер уруглар поликлиникаларында ээлчегни эвээжедип, уругларның диш аарыгларын эмнээринге идигни бээр ужурлуг.
Уруглар стоматологиязының эргелекчизи Айя Канкованың чугаазы-биле алырга, стоматология кабинеттери чок школалар өөреникчилери фельдшер эмчиден бижикти алгаш, кожазы школаларда кабинеттерже барып болур. Чижээ, 1 биле 7 дугаар школа өөреникчилери 15 дугаар лицейге, а 2 биле 4 дугаар школалардан 3 дугаар школаже барып, эмнедип болур. Мурнуу микрорайонда ниити өөредилге албан черлериниң өөреникчилери 16 дугаар лицейже баар.
Бо чоокку үеде 18 дугаар лицейге, кадет корпуска база школа-интернатка диш эмнээр кабинеттер ажыттынар. А уругларның стоматология поликлиниказында үш кабинетти немей ажыдары-биле, ону септеп, чаа дериг-херекселдер-биле дериир ажылдар чоруп турарын Айя Канкова дыңнаткан.
Республиканың кожууннарындан дүрген дуза херек уругларны күрүнениң уруглар стоматологиязы амдыызында хүлээп турар.
