Найысылалдың школачыларынга допчулалдыг экскурсия

Тываның төвү Кызыл – Бии-Хем биле Каа-Хемниң каттышкан белдиринде Улуг-Хемниң ужун алган кайгамчык чараш черде турар.

Кызылдың 17, 2, 3 дугаар школаларының база дыңнаары кошкак уругларның школа-интернадының уруглары «Кызылда дыштанылга» деп найысылалдың онза солун черлерин көөрү-биле, допчулалдыг экскурсияны республиканың немелде өөредилге сайзырадыр төвүнүң туризм, чурт-шинчилел болгаш экология килдизиниң ажылдакчылары эрттиргенин ТР-ниң Өөредилге яамызы дыңнаткан.

Экскурсия бөлүүнүң уруглары беш шак дургузунда Арат шөлүнге, Салчак Токаның, Тыва эки турачыларның, Ада-чурттуң Улуг дайынының киржикчилериниң, Кызыл партизаннарның, «Кызыл кош» тураскаалдарынга, ол ышкаш Тиилелге шөлүнүң болгаш Азия төвү скульптурлуг комплекстеринге чедип, хоорайның чараш черлерин көргеннер.

Найысылалдың девискээринге экскурсияның программазынче «Цеченлинг» хүрээзинче, А.С. Пушкин аттыг республиканың библиотеказынче, Тываның 5 чыл аттыг стадионунче, В.Көк-оол аттыг хөгжүм-шии театрынче, Улусчу чогаадылга бажыңынче, ТР-ниң Чазааның Бажыңынче база ТР-ниң Дээди Хуралынче баары кирип турар.