ТР-ниң Чазак Даргазының оралакчызының хүлээлгезин күүседип турар Алексей Сазан-оолдуң удуртулгазы-биле назы четпээннер херектерин сайгарар болгаш оларның эргелерин камгалаар талазы-биле албан черлер аразының комиссиязының хуралы болуп эрткен.
Видеохарылзаа дамчыштыр эрткен хемчегге республиканың кожууннар болгаш хоорайларында назы четпээннер херектери болгаш оларның эргелерин камгалаар комиссияларның даргалары болгаш кежигүннери киришкен.
Хуралга назы четпээннер ортузунда онза болуушкуннарны, назы четпээннерниң кем-херек үүлгедиишкиннерин болгаш өске-даа көргүзүглер талазы-биле албан черлер аразының үш ажылчын бөлүктериниң ажылын делгереңгей сайгарган. Республиканың өөредилге, кадык камгалал, күш-ажыл болгаш социал политика яамыларының төлээлери база комиссиялар удуртукчулары ажылдарын илеткээн.
Республика девискээринде аңгы-аңгы деңнелдиң профилактика субъектилери назы четпээннерниң болгаш оларга хамаарыштыр хоойлуга удур үүлгедиглерни болдурбазынче, ол ышкаш оларның эргелерин камгалаарынче угланган комплекстиг хемчеглерни боттандырып турар. Хуралга таныштырган сан-чурагайлардан алырга, амгы үеде Тывада социал айыылдыг байдалда 316 өг-бүле бар, олар 1064 ажы-төлдү азырап турар.
ТР-ниң Иштики херектер яамызының регионда назы четпээннерниң кем-херек үүлгедиишкиннериниң дугайында медээзинден алырга, бо чылдың 10 айында назы четпээннерниң кем-херек үүлгедииглери кызырылган (-0,7 хуу).
Каа-Хем, Тожу, Тере-Хөл, Тес-Хем, Улуг-Хем, Чөөн-Хемчик, Сүт-Хөл, Мөңгүн-Тайга кожууннарда корум-чурум үрээшкиннери көвүдээн. Ооң-биле чергелештир уругларның кемдеп-берттинериниң саны 21 хуу эвээжээн (347-ден 274-те келген).
Албан черлер аразының ажылчын бөлүктери назы четпээннерниң киржилгези-биле болган болуушкуннарга хамаарыштыр шупту 55 хуралды эрттирген. Таңды кожууннуң Дүрген суурга бичии чаштың доңуп чок болган черинче ноябрьның 17-де сөөлгү үнүүшкүннү кылган. Назы четпээннер-биле холбашкан болуушкуннарның кол чылдагааннары – ада-иелерниң харыысалга чогу болгаш профилактика субъектилериниң түңнел чок ажылында деп, тускай мергежилдиглер демдеглээн.
Тываның Чазааның чанында назы четпээннер херектери болгаш оларның эргелерин камгалаар талазы-биле албан черлер аразының комиссиязының кежигүннери чыл эгезинден бээр республиканың профилактика системазының 79 органның болгаш албан черлериниң ажыл-чорудулгазын хынаан. Хыналданың түңнелде, албан-дужаалынга тааржыр-таарышпазының албан хыналдаларын чорударынга элээн каш саналды киирип, профилактика органнарының болгаш албан черлериниң 20 хире ажылдакчызынга онааштыр чурум үрээни дээш харыысалганы онааган.
Оон аңгыда хурал үезинде, назы четпээннер херектери болгаш оларның эргелерин камгалаар ведомстволар аразының комиссиязының чарлааны Адалар хүнүнге тураскааткан видео-байыр чедириишкин мөөрейиниң тиилекчизин болгаш шаңналдыг черлер ээлээн кижилерни шаңнаар езулалды эрттирген.
Чаа-Хөл кожуундан Кууларларның өг-бүлези – адазы Сыдым-оол Мактал оглу биле оглу Сүлде бирги черни ээлээш, хүндүлел бижикти, 5 муң рубль акша шаңналын база Тываның В. Көк-оол аттыг Национал хөгжүм-шии театрынче алды билетти алганнар.
Ийиги черни Бии-Хем кожуундан тускай шериг операциязының киржикчизи, бот-ада Сылдыс Ховалыгның чеди ажы-төлдүг өг-бүлези ээлээн. Оларга хүндүлел бижикти, 3000 рубль акша шаңналын, Тываның күрүнениң ойнаар-кыстар театрынче он билетти тывыскан. Барыын-Хемчик кожуундан школаның «Алаш» спорт клуву үшкү черни ээлээш, хүндүлел бижикке, бир муң рубль акша шаңналынга база «Сүбедей» спорт комплекизиниң дош залынга дыштаныр он билетке төлептиг болган.
