ТР-ниң назы четпээннерниң хайгаарал чок чоруурун база корум-чурум үүлгедиишкиннерин болдурбазын хандырар күрүне программазы-биле чылдың-на эрттирип турар «Тергиин хөй-ниити дагдыныкчызы» мөөрейниң түңнелдери чарлаттынган.
Республикада шупту 356 хөй-ниити дагдыныкчылары 400 ажыг уругларны хаара туткан ажылдап турар. Аңгы-аңгы мергежилдер аайы-биле дагдыныкчыларны хувааган. Оларның аразында муниципалдыг ажылдакчылар, яамылар болгаш албан черлериниң тускай мергежилдиглери, аңгы-аңгы деңнелдиң төлээлекчи органнар депутаттары, спортчу тренерлер, эрге-хоойлу камгалаар органнарның ажылдакчылары, хөй-ниити организацияларының төлээлери дээш, өскелер-даа бар.
Тываның Чазааның чанында Назы четпээннер херектери болгаш оларның эргелерин камгалаар талазы-биле албан черлер аразының комиссиязы мөөрейни организастаан. 2023 чылда эгелээн мөөрей назы четпээн уруглар кижизидилгезинде ада-иелерге азы оларны төлээлээн кижилерге дузалажып турар хөй-ниити дагдыныкчыларының ат-алдарын болгаш эрге-байдалын бедидер дээш эртип турар.
Кызылдың Аныяктар ордузунга эң-не эки хөй-ниити дагдыныкчызын шаңнаар езулал болуп эрткен. Арга-дуржулгалыг дагдыныкчылар аразында башкылар, муниципалдыг ажылдакчылар, «Баштайгыларның шимчээшкининиң» координаторлары база культура ажылдакчылары бар.
Он муниципалдыг тургузугларга эрткен муниципалдыг чаданың соонда, республика деңнелдиг мөөрейниң түңнелдерин чарлаан. Республика деңнелдиг чадага тос дагдыныкчы киришкен.
Яамылар болгаш албан черлерниң, хөй-ниити организацияларының, уруглар болгаш аныяктарның «Баштайгыларның шимчээшкини» бүгү-российжи хөй-ниити-күрүне шимчээшкининиң төлээлери кирген жюри кежигүннери хөй-ниитичи дагдыныкчыларның ажыл-чорудулгазын үнелээн. ТР-ниң Чазак Даргазының оралакчызының хүлээлгезин күүседип турар Алексей Сазан-оол мөөрей комиссиязын удурткан.
Мөөрейниң республика чадазының киржикчилери хөй-ниити дагдыныкчызының ажыл-агыйын таныштырып, дагдыныкчы ажыл-чорудалга институдунга, бодунуң хайгааралында кижиге, коллегаларынга, өг-бүлезинге хамаарылгазын болгаш амыдыралчы көрүжүн тайылбырлаан. Киржикчилер боттарының хайгааралында назы четпээннер-биле дагдыныкчының ажылын көргүскен бодунуң программазының сайгарылгазын база видеоролигин таныштырып көргүскен. Мөөрейниң эң-не солун кезээ – «Салым-чаяаныглар калейдоскову» деп онаалгалыг чогаадыкчы оюн-көргүзүгнү жюриге көргүскен.
Шупту шылгалдаларның түңнелдерин каткан соонда, бирги черни болгаш «Тергиин дагдыныкчы» деп атты Таңды кожуун чагыргазының культура эргелелиниң начальниги Юлия Хомушкага тывыскан. Ийиги черни Ак-Довурактың даг техникумунда уругларның хөй-ниити организациялары-биле кижизидилге болгаш кады ажылдаарынга директорнуң чөвүлекчизи Шеңне Ховалыг алган. Республиканың Улусчу чогаадылга болгаш дыштанылга төвүнүң директорунуң оралакчызы албан-дужаалды күүседип турар Чойган Дадар база Өвүр кожууннуң чагырга даргазының социал политика талазы-биле оралакчызы Чодураа Шойдан үшкү черлерни үлешкеннер. Тиилекчилерге акша шаңналдарын тывыскан.
Оон аңгыда аңгы-аңгы номинацияларда тиилекчилерни база илереткен. Кызылдың 22 дугаар школазының күш-культура башкызы Денис Делег «Дагдыныкчы-лидер» деп ноимнацияга шылгараан. «Баштайгыларның шимчээшкини» бүгү-российжи уруглар болгаш аныяктарның хөй-ниити-күрүне шимчээшкининиң Каа-Хем кожуунда муниципалдыг координатору Надежда Каадыр-оол «Чогаадыкчы ажыл-чорудулга» деп адырга тергиидээн. «Баштайгыларның шимчээшкини» бүгү-российжи уруглар болгаш аныяктарның хөй-ниити-күрүне шимчээшкининиң Бии-Хем кожуунда муниципалдыг координатору Алдынай Куулар «Уругларга чүрээм берип тур мен» деп номинацияга тиилээн. Чөөн-Хемчик кожуунда Теве-Хая сумузунуң баштыңы – Төлээлекчилер хуралының даргазы Аяна Куулар «Дагдыныкчы – ийиги ада-ие» деп номинацияда тиилекчи болган.
Мөөрейниң шупту киржикчилеринге белектерни, ол ышкаш республиканың кадык камгалал болгаш эмчи профилактиказының төвүнге консультациялар алыр сертификаттарны тывыскан.
Тываның Чазааның чанында Назы четпээннер болгаш оларның эргелерин камгалаар талазы-биле албан черлер аразының комиссиязының ажыл-чорудулгазын хандырар эргелелдиң начальниги Айлана Сарыглар 2026 чылдан эгелеп Бүгү-россия чергелиг «Чуртталгада кол кижи» төлевилел эрттирерин чарлап, дагдыныкчы болур күзелдиг кижилер Добро.рф деп шөл таварыштыр бүрүткедип алырын дыңнаткан.
