2024 чылда 165 муң ажыг кижиниң 284 муң өнчү-хөреңги объектизинге үндүрүглерни санаан. Ооң ниити түңү 492 сая рубль болган.
Федералдыг үндүрүг албанының Тывада эргелелиниң медээзи-биле алырга, республиканың аңгы-аңгы муниципалдыг тургузугларында бюджет организацияларының ажылдакчыларының өнчү-хөреңги үндүрүглерин төлээнин сайгарып көөрге, үндүрүг төлевириниң талазы-биле Чаа-Хөл кожуун (81 хуу), Эрзин (80 хуу), Бай-Тайга (75 хуу) кожууннар эки рейтингиде болган. Кызыл (21 хуу), Тере-Хөл (23 хуу), Улуг-Хем (26 хуу) кожууннар эң хожудаңгайларның санында.
Республика ооң-биле чергелештир эрткен үелерде төлевээн үндүрүг өрелерин эвээжедир дээш ажылды чорудуп турар. Бо чылдың тос айларында өре 80 сая рубльге, азы 43,4 хуу кызырылган. Эң хөй өре Кызыл хоорайның чурттакчыларында – 63 сая рубль.
Тываның Баштыңы Владислав Ховалыг үндүрүглер чыылдазын күштелдирер даалганы Федералдыг үндүрүг албанының регионда эргелелинге дагзып, а күүсекчи эрге-чагырга органнары болгаш кожуун чагырга удуртукчуларынга ажылдакчылар ортузунга тайылбыр ажылын база өрелиг кижилерни илередири-биле үнүүшкүннерни чорудар даалганы бергенин сагындыраал.
Федералдыг үндүрүг албанының Тывада эргелелиниң удуртукчузу Алдын-Херел Кара-Сал ээзи чок объектилерни ончалалының чамдык түңнелдерин дыңнаткан. Амгы үеде 92 чурттакчылыг черлерде ээлерлиг 617 ындыг ээн өнчү-хөреңги илереттинген, олар үндүрүг төлевейн турар. Ол объектилерниң өнчү ээлери үндүрүглерин төлээш, моон соңгаар өрелер чыылбас дээш учеттан объектилерни уштууру чугула. Бо чылдың ноябрь 1-ден эгелеп өнчү-хөреңги үндүрүглеринде өрени суд шиитпири чокка чыып эгелээрин Тываның федералдыг үндүрүг албаны сагындырып турар. Бо хемчег өре чыылдазының үре-түңнелин бедидеринче база өнчү үндүрүглеринде өрениң ниити хемчээлин эвээжедиринче угланган.