Өнчү-хөреңги үндүрүглерин чыыр кампанияны ноябрь 25-ке чедир узаткан

Тывада кижилерден өнчү-хөреңги үндүрүглеринге амгы төлевирлер болгаш өрелер чыырының шалыпчы айы ноябрь 25-ке чедир уламчылаар. ТР-ниң Саң-хөө яамызының медээзи-биле алырга, ниити өрениң түңү 117,3 сая рубль четкен.

2024 чылдың июньда баштайгы шалыпчы ай эрткен. Ынчан республика чурттакчыларның өнчү-хөреңги үндүрүүнге өрезиниң түңү 150 сая рубль турган. Дөрт ай дургузунда өрени 27 сая рубльге эвээжедип, 123,4 сая рубьде эккелген. Октябрь 20-ниң хүнү-биле эң хөй өре транспорт үндүрүүнде – 61,2 сая деп, үндүрүг ажылдакчылары медеглээн.Чер үндүрүүнге өре ийиги черде – 42 сая рубль. Өнчү-хөреңги үндүрүүнге өре – 14 сая ажыг рубль.

Муниципалдыг албан-хаакчылар болгаш үндүрүг ажылдакчылары кирген ажылчын бөлүктер өрелиг улустарны кезип, бүдүрүлгелерниң болгаш организацияларның коллективтери-биле ужуражып турар. Үндүрүглерде өрелиг кижилерниң даңзызын ажыл берикчизинче дамчыдып, олар-биле тайылбыр ажылын чорударын сүмелээн.

Хамааты кижи Россияның федералдыг үндүрүг албанының сайтызында электроннуг сервистерни ажыглап, үндүрүг төлекчизиниң бодунуң кабинеди база «Уплата налогов и пошлин» сервис таварыштыр өрелерин болгаш үндүрүглерин төлеп болурун, Үндүрүг албаны дыңнаткан. Ол ышкаш күрүне ачы-дузаларның порталында «Налоги ФЛ» мобильдиг капсырылга база төлевир терминалдары, банкоматтар база чээли организацияларының кассаларынга төлевирлерни кылып болур.

Эт-хөреңги үндүрүглерин муниципалдыг бюджетче киир санаар база оларның орулгазының кол статьязы болур. Ол үндүрүглерни төлевес азы чедир киирбес болза, үндүрүг төлекчилериниң чурттап турар суурлары болгаш хоорайларының хөгжүлдезинче болгаш чаагай чоруунче угланган хемчеглерниң акшаландырыышкыны кызырлы бээр.