Үндезин чокка өртектер өстүрген сайгарлакчыларга хамарыштыр

Тываның Баштыңы Владислав Ховалыг өртектерни кайы-хамаанчок өстүрген садыгжыларга административтиг хемчеглерни онаарын негээн.

Эрге-чагырга органнары-биле хыналда-хайгаарал албан черлери хереглел барааннарының өртектеринге хыналданы шыңгыырадыр айтыышкынны Владислав Ховалыг аппарат хуралынга берген. Бирги хереглелдиң аъш-чем аймаанга үндезин чокка өртектер өстүрген сайгарлакчыларга хамарыштыр шиитпирлиг хөделирин ол негээн.

Регионнуң удуртуп-башкарылга төвү хамаатыларның дыңнадыгларынга даянгаш, хереглекчилер рыногунга эрткен неделяда чоруткан мониторингиниң түңнелдерин барымдаа кылгаш, ындыг шиитпирни үндүрген. Төптүң дыңнатканы болза, февраль ортандан эгелеп аъш-чем аймааның өртектери өскен. Өреме 40 хуу, чигир – 13,9 хуу (килде 95-98 рубль четкен), томаттар – 13,7 хуу, далган – 12,2 хуу, хендир үзү – 11,3 хуу, хаван база инек эъди – 9-10 хуу өскенин республиканың чурттакчылары дыңнаткан.

Сайгарлыкчылар кол садыгланыр чери – Абакан хоорайда барааннарның садар өртээ улгатканында деп тайылбырлаан. Ындыг болзажок, чүгле Абаканның мөөң садыгжылары буруулуг эвес дээрзин хыналда көргүскен. Чижээ, чүгле чаңгыс Тожу кожуунда безин, ооң мурнунда-ла саткан барааннарның өртээн өстүрген алды факт илереттинген. Аъш-чем барааннарының өртээ өзерин манап, түр када шыгжап каар бодаан таварылгалар база бар. Кызылдың садыг четкилеринде шак ынчалдыр чигир “чиде берген”.

Владислав Ховалыг кризиске удур штабтан бирги хереглелдиң аъш-чем аймааның өртээн ужур-утка чок өстүрген таварылгаларны сайгарып, ажылынга шыңгыы болуп, чөптүг хемчеглерни алырын негээн.

– Берге үени ажыглап, байып алыр бодаан коммерсантыларның кара туразында чаңнаарын болдурбас бис, акша кол эвес, а бот-боттарынга дузалажып, деткижери чугула деп билип каар кылдыр, олудунче салыр херек – деп, Тываның Баштыңы чугаалаан.

Административтиг хемчеглер-биле чергелештир, өске аргаларны ажыглап, өртектерни тудар херек деп, Владислав Ховалыг чугаалаан. Чазактың экономика адыры боттарын ажыл-биле хандырттынган хамаатыларга база хууда дузалал ажыл-агыйларынга, сайгарлыкчыларга боттарының барааннарын садып-сайгарарынга таарымчалыг байдалдарны тургузуп, ярмаркаларны көвүдедип, чаа шөлчүгештерни ажыдар ужурлуг.

Оон аңгыда, Тываның экономиктиг хөгжүлде болгаш үлетпүр яамызы бирги хереглелдиң барааннарынга өртектерни кызыгаарлаары-биле, улуг садыг четкилери болгаш мөөңнеп садар хандырыкчылар-биле дугуржулгаларны чарар ужурлуг.

Чуртта ындыг арга-дуржулганы ажыглап турар. Чижээ, Хабаровск крайның эрге-чагыргазы сайгарлыкчылар-биле чамдык аъш-чем продуктуларынга өртекти 10 хуудан өстүрбезин, а эң-не чугула херек чүүлдерге эң бичии хууну салыр деп дугурушкан.

Росстаттың медээзи-биле алырга, февральдың 26-дан марттың 4-ке чедир, ниитизи-биле РФ-те инфляция бүдүн чылга онааштыр алырга 10,42 хуу, эрткен неделядан 9,05 хуу улгаткан. Чыл эгезинден инфляцияның деңнели 4,75 хуу четкени ол. Аңаа аъш-чемге хамаарышпас барааннарның, чиик автомашиналарның база бажың техниказының өртээниң өскени салдарны чедирген.