Тываның Күш-ажыл яамызы тускай шериг операциязының киржикчилериниң ажы-төлүнге немелде деткимче хемчеглери-биле чаңгыс катап төлээр төлевирлерни үлеп эгелээн.
Тываның Баштыңы Владислав Ховалыгның Дээди Хуралдың депутаттарынга Айыткалын күүседири-биле, регионда тускай шериг операциязының киржикчилериниң өг-бүлелеринге немелде социал деткимче хемчеглерин боттандырып турар. Школа назылыг ажы-төлдүг шериг албан-хүлээлгелиглерниң өг-бүлелери школага чемненир болгаш хөй-ниити транспортунга аай-дедир чоруур чарыгдалдарынга компенсацияны алыр. Республиканың Күш-ажыл болгаш социал политика яамызы дыңнатканы-биле алырга, төлевирлер чоокку хүннерде алыкчыларның агар саннарынче кирип эгелээр.
Владислав Ховалыг бо чылдың январьда депутаттарга берген Айыткалында, тускай шериг операциязының киржикчилериниң өг-бүлелеринге чаа деткимче хемчеглерин эгелээрин саналдаан турганын сагындыраал. «Тускай шериг операциязының шупту киржикчилериниң өг-бүлелеринге амгы деткимче хемчеглери күштүг бооп артар база чаа хемчеглер аңаа немежир. Бо чылын олар уруглар садының ада-ие төлевиринден хосталыр. А чаа өөредилге чылындан эгелеп, 5-тен 11-ги класстарга чедир уругларның чемненилге өртээнге, ол ышкаш 1 класстан 11-ги класстарга чедир өөреникчилерниң хөй-ниити транспортунга аргыжылга өртээнге чарыгдалдарның чартыынга чаңгыс удаа бээр компенсацияны киирер бис» – деп, Тываның Баштыңы дыңнадып, ол эгелээшкинниң күүселдезин организастаарын харыысалгалыг албан черлеринге дааскан.
Тываның Баштыңы 2025 чылдың чазынында Тывада Тускай шериг операциязының киржикчилериниң ажы-төлүнге социал деткимче хемчеглериниң даңзызын калбарткан документини бадылаан. Бо документ езугаар, тускай операция киржикчилериниң 5-тен 11 класска чедир ажы-төлүнге, өөредилге хүнүнде эртенги азы дүштеки бир изиг чемниң ортумак өртээниң 50 хуузун эгидип бээри көрдүнген. Эге класс өөреникчилериниң кандыг байдалдыы хамаанчокка, школага халас чемгерерин сагындыраал. Оон аңгыда, тускай шериг операциязының киржикчилериниң өг-бүлелеринден школачыларның хөй-ниити транспортунга чораан өртээн дуглаарынга чаңгыс катап бээр төлевирни доктааткан. Бо акша төлевирниң хемчээлин неделяның беш өөренир хонуунда школаже хүнде аай-дедир ийи катап чоруур өртээнге даянып санаан.
Бо чылын тускай шериг операциязының киржикчилериниң 3399 ажы-төлү школага чемненир өртээниң чамдык кезиин эгидип алыр. 1500 ажыг уруг школаже муниципалдыг хөй-ниити транспорту-биле халас чоруп болур.
Республиканың чазаа ол хүлээлгелерни күүседири-биле, чылдың-на тускай шериг операциязының киржикчилерин болгаш оларның өг-бүлелерин деткииринче угландырган 300 сая рубльге немей 30 сая рубльди тускайлаан.
Тываның Күш-ажыл яамызының медээзи-биле алырга, октябрь 21-ге чедир 106 өг-бүле школага чемненилге төлевириниң кезек чартыын эгидер дугайында билдириишкинни киирген. 94 ажы-төлдүг 73 өг-бүлеге чогумчалыг шиитпирлер хүлээп алдынган, ам арткан билдириишкиннерни специалистер сайгарып турар. Өөредилге чылының эгезинден декабрь 31-ге чедир үе дургузунда уруг бүрүзүнге ол чаңгыс катап төлээр төлевир 3720 рубль болур.
103 өг-бүле хөй-ниити транспортунга чораанының чаңгыс катап компенсация төлевирин дилээн. 121 ажы-төлдүг 77 өг-бүлеге төлевирлерни бээр дугайында шиитпир үнген. Арткан билдириишкиннер сайгарылгада. 2025 чылдың сентябрь 1-ден декабрь 31-ге чедир бир уругга-ла 3200 рубль түңнүг компенсация төлевирин шилчидер.
Амгы үеде төлевир алыкчыларының агар саннарынче акша-хөреңгини шилчидип эгелээн.
Ук деткимче хемчеглерин алыр дизе, Тыва Республиканың Күш-ажыл болгаш социал политика яамызынче азы чурттап турар чериниң аайы-биле Хөй хүлээлгелиг төпче билдириишкинни киирерин сагындыраалыңар.
