Ногаа болгаш чечектер үрезиннерни олурткан

Чөөн-Хемчик кожууннуң Өг-бүлеге болгаш уругларга социал дуза чедирер төвүнүң ажылдакчылары ногаажыларга «Огород – өг-бүлеге немелде орулга» деп мастер-классты эрттирип, ногаа болгаш чечектер үрезиннерни олурткан. Шак ынчалдыр өг-бүлелер огород тарыыр арга-дуржулганы шиңгээдип ап турар.

Эрте чазын-на огород ажылы хайнып үнер. Чаш үнүштерни тарааш, үрезиннерниң өзүмнери көстүп келирге, чылыткыга тарып өстүрери, огородка олуртуру, ажаап-тежээри дээш ажыл-ла эңдерик.

Суму бүрүзүнде хөй ажы-төлдүг болгаш эвээш орулгалыг өг-бүлелерниң өрегелеринге социал ажылдакчылар чедип, үрезин тарылгазындан эгелээш, дүжүт ажаалдазынга чедир арга-сүмезин кадып турар.

Социал дуза алыкчыларының барык шуптузу картофель, борщ кылыр ногааларны тарып алыр. Огурец, помидор, перец, свекла, морковь дээш өске-даа ногаа аъш-чемге немере болур.

Кожуунда огород ажыл-агыйын чорудуп турар өрегелерниң саны чылдан чылче немежип турарын соцажылдакчылар демдеглеп турар.