Сүт-Хөл кожууннуң Черлиг-оол Куулар аттыг төп ном саңынга Суг-Аксы суурнуң ногаажыларынга ТР-ниң Дээди Хуралының депутаты, Хөй-ниитиниң кадыкшыл болгаш медицинаның профилактика төвүнүң кол эмчизи, диетолог Анджела Канчыыр-оол «Огород – соңга адаанда аптека» деп темага солун лекцияны номчаанын ном саңы дыңнаткан.
Кижиниң бодунуң огородунга ногааны өстүрери чүгле өг-бүле бюджединге деткимче эвес, а кижиниң кадыкшылынга эң-не чугула чүүл дээрзин эмчи тайылбырлаан.
Ногаа болгаш чимис аймаанда кадыкшылга чугула херек шупту витаминнер бар болганындан, ону садыгдан садып алырының орнунга, боду тарып, ажаап алганы дээре.
Боттуң огородунга өстүрген ногаа болгаш чимистиң шынары болгаш ажыктыы улуг болур, чүге дизе ногаажылар колдуунда органиктиг чемишчидилгелерни ажыглап турар.
Огородка уе шакты сагып тургаш ажылдаары кижиниң чүгле күш-дамыр сайзыралынга эвес, а хан-дамыр эргилдезиниң, нерв системазының ажылынга база улуг ужур-дузалыг.
Диетолог эмчи ажык чугаа үезинде чыылганнарны кандыг ногаа, чимисти өстүрүп турарын айтырып, элбек дүжүдүн болбаазырадырының аргаларын сонуургаан.
А.А. Канчыыр-оол Ыдыктыг Сака Дава айында төп ном саңынга сарыг шажын философиязының чаа парлаттынган номнарын сөңнеп, ногаажыларга ногаа үрезиннерин үлеп берген.