Ном саңы – аржаанчыларның ынак чери

Ураан Монгуш – Бии-Хем кожууннуң Аржаан сумузунуң ном санынга 33 чыл үре-түңнелдиг ажылдааш, хүндүлүг дыштанылгаже үнген. Амгы үеде ол сумунуң «Энелер» хоочуннар чөвүлелин удуртуп турар.

Идепкейжи эне сумунуң ном саңының эргелекчизинге күзүн чаа томуйлаткан аныяк ажылдакчы Чойган Тюлюштюң дагдыныкчызы болуп, арга-сүмезин кадып, кады демниг ажылдап турарын чагырга чери дыңнаткан. Ураан Айдыновна чонунуң хүндүткелин чаалап алган сумунуң хүндүлүг хоочуннарының бирээзи.

Аныяк библиотекарь ном саңы – аржаанчыларның ынак культурлуг дыштанылга чери апарганын демдеглеп турар. Номчукчулар номну келгеш бижидеринден ангыда, ында эртип турар аңгы-аңгы хемчеглерниң идепкейлиг киржикчилери.

Ном саңы Адалар хүнүнге уткуштур «Кижизидилгеде аданың салдары» деп темага солун хемчегни эрттирген. Аңаа сумузунуң үлегерлиг адалары – «Кыштаг» төлевилелдиң 2016, 2018 чылдарның киржикчилери Андрей Биче-оол биле Борис Сурунчук идепкейлиг киришкен. Олар өг-бүледе ада кижиниң ролюнуң дугайында, эр улустуң эдилелдери – эзер, чүген, чулар кылырының чажыттарын уругларга тайылбырлап бергеннер.

Иелер хүнүнүң бүдүүзүнде ном саңы ээлчеглиг аалчызын чалаан. Бо удаада номчулга төвүнге «Социал керээ» программаның киржикчизи, «Аржаан» кондитер кылыглар цегиниң ээзи Айлана Калбак кээп, номчукчуларга торт быжырарының аргаларын көргүзүп, «амданныг» мастер-классты эрттирген. Школачылар улуг сонуургал-биле торт быжырарын болгаш каастаарын өөренип алганнар.

Ном санының аныяк эргелекчизи Чойган Тюлюштю ооң дагдыныкчызы Ураан Монгуш кезээде деткип, арга-дуржулгазын харам чокка дамчыдып чоруур эне.