Сүт-Хөл кожууннуң Черлиг-оол Куулар аттыг төп ном саңынга Россия Федерациязының культуразының алдарлыг ажылдакчызы, Тываның Улустуң чогаалчызы Артык Ховалыгның 75 харлаанын уткуштур “Ырлаксанчыг, ынаныштыг салымныг, Ыя-ла каш тыва чонум – хайырам” деп республиканың барыын талакы кожууннарының киржилгези-биле номчулга фестивалы болуп эрткенин ном саңы дыңнаткан.
Онлайн хевирге эрткен уран номчулгага школачылар болгаш улуг улус идепкейлиг киришкен.
Бирги черге Бижиктиг-Хая көдээ ном саңының эргелекчизи Саида Хертек төлептиг болган. Ийиги черни Бора-Тайга сумузундан ТР-ниң культуразының тергиини Оюмаа Ондар, үшкү черни Барлыктан Оксана Монгуш алган.
Улуг киржикчилер аразынга “Уран номчулганың тускай диплому” шаңнал бижикке Хөр-Тайга ортумак школазының башкызы Марина Ооржак төлептиг болган. Арткан киржикчилер “Уран номчулганың нептередикчизи”, “Уран номчулганың чалыы киржикчизи” деп тускай шаңналдарны алган.
Номчулга фестивалының киржикчилери – Эрги-Барлыктан Урана Саая “Уран номчулганың ненептередикчизи”, Суг-Аксындан Лияна Күжүгет “Уран номчулганың тускай диплому” шаңнал бижиктерге төлептиг болган.
Барыын-Хемчик кожууннуң уругларның үлегер-майыктың ном саңының эргелекчизи Шончалай Соянга болгаш библиотекарь Людмила Донгакка (Кызыл-Мажалык) өөрүп четтириишкин бижиин тывыскан.
Сүт-Хөл кожууннуң төп ном саңының удуртулгазы шылгарааннарга шаңнал бижиктерден аңгыда акша шаңналдарын тывыскан.