Чогаадыкчы төлевилелдерни боттандырарынга Тываның Баштыңының культура болгаш уран чүүл адырында грант алырынче чагыгларга мөөрей шилилдезиниң түңнелдерин үндүрген.
ТР-ниң культура болгаш туризм сайыды Виктор Чигжиттиң башкарылгазы-биле мөөрей комиссиязы хуралдаан. Культура болгаш уран чүүл адырында хуу сайгарлыкчылардан, боттарын ажыл-биле хандыртынган хамаатылардан 31 чагыг кирген. Шупту чагыгларны үнелеп сайгарган соонда, тиилекчилерни илереткен.
Аяс Кагай-оолдуң чурттакчы чоннуң номчуттунарын нептередир сорулгалыг “Номга тураскаал” деп арт-объект тудар дээн төлевилели хөй үннү алгаш, шылгараан. Ук төлевилелдиң боттаныышкынынче грант кылдыр 300 муң рубльди бээр. Ол акша-хөреңги-биле скульптура тудар материалдар садар.
Олег Хомушкунуң «Тыва хомус» деп каасталга мастерскаязын тудар дээн төлевилели 200 муң рубльдиң грантызынга төлептиг болган. Ол акша-хөреңгини мастерскаяны дерип, чепсеглээринче үндүрер.
Комиссия чагыглар санының хөйүн өөренип көргеш, 2023 чылда ниити бюджеттен бээр грантының түңүн болгаш хемчээлин улгаттырарын саналдап киирген.
