К.И. Чуковский аттыг уруглар ном саңында Наадым байырлалынга тураскааткан «Малчыннарга йөрээл» деп номнар делгелгезин белектээн.
Делгелгеде мал-маганы канчаар азыраарының дугайында дээш-ле оон-даа өске мал ажылынга хамаарышкан материалдарны, номнарны салган.
Наадым – тыва улустуӊ шагдан тура, онза-солун, чараш байырлалы. Ол дээрге өгбелерден дамчып келген көшкүн амыдыралдыӊ чаагай чараш чаӊчылы. Мал-маган азырап чоруур ишчи чоннуӊ ажыл-агыйын бедик үнелээниниң демдээ.
Малчыннарның национал байырлалынга албан болур мөөрейлери: хүреш, аът чарыжы, ча адары, тергиин эки өгнү илередири, эң эки национал хепти болгаш аъттарныӊ каасталгазын илередири.
Ук байырлалды Тывага 1922 чылдан тура-ла, Тыва Арат Республиканың тургустунганындан бээр, демдеглеп эгелей берген. Тываның Совет эвилелинге турган үезинде байырлалды эрттирерин хоруп каапкаш турган, 1993 чылда байырлалды катап эгиткен.
«Чуковканың» коллективи номчукчуларын делгелгени сонуургап көөрүнче чалап турар.