Бо чылын Тываның спортчу ниитилежилгезиниң кол болуушкуну – «Чылдың тергиин спортчулары-2025» мөөрейниң тиилекчилерин Кызыл кожууннуң Каа-Хем суурда чаа ажыттынган «Тиилелге» спортчу-культура төвүнге шаңнап-мактаан.
«Тергиин спорт клуву» шаңналга Кызылда «Олимп» фитнес-залдар четкизиниң удуртукчузу Айдемир Сат төлептиг болган.
Айдемир Сат тускай шериг операциязының киржикчилерин, ис чок читкен дайынчыларның өг-бүлелерин деткип турар. Аныяк сайгарлыкчы оларга чиигелдерни киирген. «Спорт – сагыш-сеткил дойлуушкунундан үнер идегелдиг аргаларның бирээзи» – деп, ол санап турар.
Аныяк сайгарлыкчы бичии болгаш элээди мөгелер аразынга хүреш маргылдааларының база деткикчизи.
Улуг Тиилелгениң 80 чылынга болгаш Ада-чурт камгалакчызының чылынга тураскаадып, республиканың эң улуг, 4500 чедир көрүкчүлер хүлээп алыр спортчу-культура төвүн «Тиилелге» деп адаар дугайында шиитпирни Владислав Ховалыг ТР-ниң Дээди Хуралының депутаттарынга Айыткалының үезинде чарлаанын сагындыраал.