Барыын-Хемчик кожууннуң девискээринде «Таёжный» уругларның кадыкшылга лагеринге «Евразия» чоннарның эп-найыралы фестивалы эрткенин республиканың немелде өөредилге сайзырадыр төвү дыңнаткан.
Фестиваль езулуг-ла чаңгыс эп-демниң, өөрүшкү-маңнайның байырлалы болган. Оолдар, уруглар чоннарның езу-чаңчылдары, культуразынче кайгамчыктыг аян-чорукту кылган.
Отряд бүрүзү таныштырылга концертти белеткээн: национал ыры-хөгжүм, танцы-сам, харын-даа шииден үзүндүлер. Оон аңгыда национал идик-хеп болгаш амыдыралы – уруглар янзы-бүрү чоннарның чаңчылчаан идик-хеви-биле танышкан, угулзаларның, янзы-бүрү демдектерниң ужур-утказын билип алганнар.
Ол ышкаш оюннар база мастер-класстар уругларның сонуургалын хаара туткан: орус чоннуң оюн-хөглээшкиннеринден чөөн чүк чоннарының езу-чаңчылдарынга чедир. Уруглар ырлажып, аңгы-аңгы чоннарның национал аъш-чемин амзап, оюннарын ойнап, 10 аңгы дылга «Экии» деп сөстү чугаалап өөренгеннер.
«Таёжный» лагеринге эрткен «Евразия» фестивалы база катап бадыткаан: эп-найырал кызыгаар чок, а ыры-хөгжүм, сагыш-сеткилден чугаа-соот уругларны демнештирген.