Бо чылын «Спутник» микрорайонунда «Семейный» чуртталга комплекизинге 106 квартираны, «Мөңгүн» микрорайонда 770 квартираны, «Победа» чуртталга комплекизинде 100 квартираны дужаары планнаттынган. Чаа туткан 1718 квартираны садыпкан болза, 1819 квартираны ам-даа садып турарын тудуг чери дыңнаткан.
Ийи хуу ставкалыг чиигелделиг ипотека программазы Тывада 2023 чылда бир дугаар ажылдап эгелээнин сагындыраал. Эгезинде ону республиканың 2359 чурттакчызы ажыглаан. Регион чуртталга тудуунуң хемчээли-биле совет үениң көргүзүүн ажып, чурттаар оран-саваны ажыглалче киирери-биле Россияда лидер кылдыр үнген.
Он үш тудуг компаниязы 188 муң дөрбелчин метр ниити шөлдүг, 4132 квартиралыг, хөй каът 60 бажыңны тудуп турар болгаш, Тываның ипотека программазының киржикчилерин чаа оран-сава-биле 2026 чылда хандырарынга белен. Тываның Баштыңы Владислав Ховалыг республиканың социал-экономиктиг хөгжүлдезинге чуртталга тудуунуң хөгжүлдези чугула черни ээлеп турарын демдеглээн.
Россияның Президентизи Владимир Путин Тываның Баштыңы Владислав Ховалыгның дилээ-биле, республикага программаны узаткан, ооң түңнелинде 2025 чылда 400 муң ажыг дөрбелчин метр ажыг чуртталга тудуун ажыглалче киирип, рекордту тургускан.
2026 чылда Тывада «Өг-бүле ипотеказы» программаның үшкү чалгыы эгелээн болгаш, аңаа хереглел улуг болуп арткан.