Тываның техникумнарының чээрби сургуулу школаларның капитал септелгезин кылып турар тудуг организациялары-биле керээни чаргаш, ажылдап эгелээн. Оолдарга арга-дуржулга шиңгээдип, акша ажылдап алырынга тергиин эки арга деп, регионнуң өөредилге сайыды Алексей Храмцов чугаалаан.
Бо чылын республиканың 26 школаларын үндезини-биле септеп-селиир, оларның 22-зинде ажылдар кидин-түлүк чоруп турар. Тыва өөредилгениң школа системазын бүрүнү-биле чаартыр программада киржип, сөөлгү үш чылда 75 школаны септеп, чаартыр ужурлуг. Тываның өөредилге сайыды тудуг ажылдарын онза хыналдага алган.
Алексей Храмцов техникумнар болгаш колледжтерде тускай мергежилдерде сургуулдарны хаара тудар аргазын тудуг организациязынга сүмелээн турган. Регионнуң студент отрядтары социал ужур-дузалыг объектилер тудуунга ажылдаан арга-дуржулгазы улуг, а 2020 чылда олар тудугнуң садыглажылгазынга киржир эргени алганын сайыт демдеглээн.
Тываның тудуг техникумунда, өөредилге чериниң Шагаан-Арыг хоорайда салбырында, Тываның политехниктиг техникумунда база Хову-Аксы суурда салбырында, ол ышкаш Кызылдың транспорт техникумунда сургуулдар тудугжу мергежилдерде өөренип турар.
#Өөредилгеяамызы #Студентотрядтар #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
Ортумак профессионал өөредилге черлериниң сургуулдарын школалар септелгезинче хаара туткан
21 июня 2022
56