Оруктарны болгаш көвүрүглерни чаартып турар

Бо чылдың төнчүзүнге чедир «Енисей» федералдыг автоорук эргелели Р-257 оруктуң беш объектизинге септелге ажылдарын доозар, ооң бирээзинге узуну барык беш километр оруктуң үндезин септелгези хамааржыр.

Оон аңгыда Өөк, Хөндергей хемнерде көвүрүглерни эде чаартыр. Узуну 150 ажыг метр кылымад шывыгны чаартып септээр. Орук шимчээшкининиң айыыл чок чоруун хандырары-биле, сагындырыглыг орук демдектерин, медээлээр чагыларны тургузар, ол ышкаш чаа шыйыгны шыярын ТР-ниң Орук-транспорт яамызы дыңнаткан.

Өвүр кожуунда «Енисей» Р-257автооруктуң 1061 база 1105 километрлеринде орук кезектерин калбартыр улуг ажылдар чорудуп турар. Ында ажылдап турар тускай мергежилдиглер орук шывыын солуур, орук кыдыын болгаш оңгарларын быжыглаар.

Орук шимчээшкининиң айыыл чок чоруун хандырары-биле, чаагайжыдылга ажылдарын кылып чорудар: шаптараазынның чаа чалдарын, 1061-ден 1066-гы километрниң оруктарының үндезин септелгезин чорудуп тура, ону калбартып, суг эрттирер хоолайларны, кудуктарга шүүрлерни салыр.

Чаа шывыгның дөжээ кылдыр асфальт сайлыг бетонну ажыглаар, ооң кырынга асфальт бетонунуң ийи каъдын чадар. Ындыг арга орук чадыының ажыглаар хуусаазын ийи катап көвүдедир.

Федералдыг орукта Өөк, Хөндергей хемнерни база 651-ги километрде хемчигешти кежир кылымал дериг-херекселдерге көвүрүг дөжээн орукчулар солуур, ооң шывыын сайлыг асфальт-бетондан кылыр, чал чагыларын быжыглаар, шаптараазын чалдарын чаартыр, чаа орук демдектерин шыяр.

Оруктуң 651-ги километринде кара-сугну кежилдир көвүрүгнүң ийи талазынга чаа чагыларны кагар, ындыг чүүл ону 12 метр чедир калбартыр болгаш орук шимчээшкининиң айыыл чок чоруун көскүзү-биле бедидер.

«Енисей» автоорук эргелели түр үениң таарымча чок байдалдарынче чолаачыларны билиишкинниг көөрүн, шаптараазыннарны оюп эртер оруктар-биле чоруун уламчылаарын дилеп турар. Септелге чоруп турар черлерге чоокшулап келгеш, машина-балгаттың дүргедээшкинин эвээжедип, доктааткан хемчеглерни сагыырын сагындырып турар.