Орус географтыг ниитилелдиң Тываlа салбырының кураторлар чөвүлелиниң чаа кежигүннери-биле үшкү хурал Тываның Чазаанга болуп эрткен. Салбырның даргазы Кара-кыс Аракчаа Тываның Баштыңы Владислав Ховалыгга Орус географтыг ниитилел биле Тыва Республиканың Чазааның кады ажылдажылга дугуржулгазын белеткээринге болгаш атты салырынга дузалашканы дээш өөрүп четтиргенин илереткен.
Ужуражылгага Тываның Баштыңының Администрация удуртукчузу Юрий Ананьин база Тыва Республиканың Дээди Хуралының даргазы Каң-оол Даваа ниитилелдиң сорулгаларын болгаш айтырыгларын шиитпирлээринге чедип алырынга хууда үлүг-хуузу дээш Орус географтыг ниитилелден өөрүп четтириишкин бижиктерин тывыскан.
«Тардан Голд» КХН-ниң чиңгине директорунуң харылзаалар тудар оралакчызы Елена Астафьева, «Лунсин» КХН-ниң директорлар чөвүлелиниң даргазы, дээрги Ли Кайвэнь, Тываның арга-арыг болгаш бойдус ажыглалының сайыды Григорий Ондар, «Тардан Голд» КХН-нуң чиңгине директору чораан Вадим Халтаев база «Тывасвязьинформ» ААН-ның чиңгине директору Сылдыс Хертек олар шаңналдарга төлептиг болган.
Кара-кыс Аракчаа бодунуң илеткелинде тургузукчу бүрүзүнүң, ол ышкаш салбырның кежигүннериниң үлүг-хуузун демдеглеп, оларның деткимчези-биле «Тываны билир мен, Россияны билир мен» деп республиканың чурт-шинчилел мөөрейин организастаанын дыңнаткан. География башкыларының эгелээшкини-биле мөөрейни чылдың-на Кызылда президентиниң кадет училищезинде эрттирип турар.
Республиканың беш школазында Орус географтыг ниитилелдиң булуңнарын ажыттынган, 2026 чылда Тываның ам-даа 45 школазынга шак ындыг булуңнар ажыттынган. 2025 чылда Орус географтыг ниитилелдиң 180 чыл оюнга тураскааткан делегей чергелиг эртем-практиктиг конференция болуп эрткен.
Тожу биле Тере-Хөл кожууннарда салбырның шинчилел отрядтарынга экспедиция сезоннарын организастаан, республикада алдын тывыжының хөгжүлдезин барымдаалап, Тарыс аржаанының экологтуг байдалын хайгаараан. Төлевилел Тываның Баштыңының грантызының акшаландырыышкыны-биле боттанып турар.
«Орус географтыг ниитилелдиң Тываның регионалдыг салбырының ажыл-чорудулгазынга кураторлар чөвүлелин тургусканы улуг салдарны берген. Боттуг болгаш үре-түңнелдиг элээн бедик деңнелче үнген бис» – деп, Кара-кыс Аракчаа демдеглээн.
Чогуур яамыларның, тус чер бот-башкарылга органнарының, «Кызыл Гранд Отель» КХН-ниң, өөредилге черлериниң, Орус географтыг ниитилелдиң Тывада салбырының кежигүннери ол төлевилелдерни боттандырарынга чугула киржилгезин демдеглээн.
Орус географтыг ниитилелдиң Тыва салбыры бо чылын IV делегей чергелиг буддийжи шуулганга болгаш Россияның чоннарының чаңгыс деминиң чылынга тураскааткан тускай хемчеглерни белеткеп турар.