Сүт-Хөл кожууннуң Александр Ондар аттыг төп культура бажыңының баарынга кожуун чергелиг «Өпейлеткен кавайым» шуулганы болуп эрткенин чагырга чери дыңнаткан.
Өг-бүле, ынакшыл болгаш шынчы чоруктуң хүнүнде болган хемчегге чаш төлге кавайны белекке бээр езулалды таныштырып, кавайлар болгаш камгалалдар делгелгезин бараалгадып, хөй ажы-төлдүг өг-бүлелерни хүндүткээн.
Кожууннуң ховар оолдарының бирээзи, «Ус-шевер чылгычы» деп аттың эдилекчизи, хостуг үезинде аъттың дериг-херекселдерин кылып чоруур, уругларның спорт школазында хол бөмбүүнүң башкызы, үш ажы-төлдүң адазы Киваа Монгуштуң чазап кылган чаа кавайын чаш уруглуг аныяк өг- бүле Азиат биле Оляна Ондарларга дамчытканы онза солун болган. Өгнүң эр ээзи чагырга черинде ажылдап турар, кыс ээзи – башкы.
Кавай – көшкүн амыдыралдыг чораан тыва чоннуң салгал дамчыыр ыдыктыг эдилели дээрзин делгелгеде салдынган кавайларның төөгүзү бадыткаан. Оларның бирээзи 75 харлыг Ишкин чурттуг Галина Сереновна Ондарның кавайы. Ыдыктыг эдилел чеден ажыг чылдар дургузунда бо хүнге дээр куруг турбайн, хүндүлүг энениң бодунуң кады төрээн дуңмаларын, алды ажы- төлүн, хөй чуржааттарының уругларындан аңгыда бо хүнде уйнуктарын чайгап, аадып өстүрүп чорууру кайгамчык.