Тываның полиция ажылдакчылары «Айыыл чок чай» акцияның чорудуу-биле профилактиктиг хемчеглерни чорудуп турарын республиканың немелде өөредилге сайзырадыр төвү дыңнаткан.
Иштики херектер яамызының «Кызылский» муниципалдар аразының килдизиниң майору Сюзанна Майынды база Кызыл кожууннуң чагыргазында назы четпээннер херектериниң талазы-биле комиссияның харыысалгалыг секретары Вера Сарыг-оол «Ногаан делегей» стационарлыг болгаш «Маяк» школа чанының хүндүскү лагерьлерге чедип, уруглар-биле ажылдаан. Олар «Уругнуң эрге-хоойлу талазы-биле байдалы» викторинаны организастап, уругларга чүгле хүлээлгелериниң эвес, а эргелериниң дугайында билиишкиннерни хевирлеп, хоойлу-дүрүмге хүндүткелдиг хамаарылганы, өскелерниң эрге-ажыын утпазын сагындырганнар. Оюн-викторинаның эң-не идепкейлиг киржикчилеринге шаңналдарын тывыскан. Хемчегге ниитизи-биле 150 уруг киришкен.
Ол ышкаш Бии-Хем кожуунда «Туранчылар» хүндүскү лагерьге Россияның Иштики херектер яамызының «Корум-чурум камгалакчызы-биле сула шимчээшкин» бүгү-российжи акция езугаар полиция ажылдакчылары Маргарита Сырат база Тумен Сырат уруглар-биле сула шимчээшкиннерни кылган.
Ужуражылганы эрттирип тургаш, полиция ажылдакчылары уругларга чайгы дыштанылга үезинде айыыл чок чоруктуң дүрүмнерин тайылбырлаан. Ук акцияга Каа-Хем кожууннуң полиция ажылдакчылары база каттышкан. Эртенги сула шимчээшкин үезинде уругларга хем-суг эриинге айыыл чок чорук, орук шимчээшкиннериниң дүрүмнерин сагындырган.
База бир солун хемчегни Тожу кожууннуң Тоора-Хем суурунда «Найырал» школа чанының лагеринде уругларга «Мегениң детектору» интерактивтиг оюнну биче лейтенант Билзей Монгуш организастаан. Оюн үезинде уруглар тоолдардан сюжеттерни сайгарып, орук шимчээшкининиң айыыл чок чоруун сактып, аңгы-аңгы таварылгаларда бодун шын алдынарын чугаалашканнар. Уруглар оюнну аажок сонуургаан болгаш, чайгы дыштанылга үезинде айыыл чок чоруктуң дүрүмнерин сагыырын даңгыраглаан.
Школачыларның чайгы дыштанылгазы чүгле солун эвес, а айыыл чок болуру-биле, ТР-ниң Иштики херектер яамызының назы четпээннер-биле ажылдаар салбырларының ажылакчылары хүндүскү база стационарлыг лагерьлерде хүн бүрүде профилактиктиг хемчеглерни чорудуп турарын сагындыраал.
