«Аныяктар болгаш уруглар» национал төлевилелдиң бир кезээ болур «Профессионалитет» федералдыг төлевилел күүселдези-биле Тывада ортумак профессионал өөредилге албан черлерин эде чаартыр ажылдар чоруп турар.
Бо хемчеглерниң кол сорулгазы – регионнуң күш-ажыл рыногунда негеттинип турар шыырак тускай мергежилдиглерни белеткээринге амгы үениң байдалдарын тургузары, ол ышкаш абитуриентилерниң колледжтер болгаш техникумнарга сонуургалын бедидер.
Ак-Довурактың даг техникумунда өөредилге корпузунда чаартылгалар кидин түлүк. Аудитория болгаш лабораторияларга амгы үениң дериг-херекселдерин тургузуп эде чаартыр, ол ышкаш дагжы мергежилдеринге практиктиг кичээлдер эрттиреринге өөредилге шөлдерин эде кылыр ажылдар чоруп турар.
ТР-ниң Өөредилге яамызы капитал септелгени хыналдада алган. Майның ортан үезинге чедир объектиниң дээвиирин ап каапкаш, ханаларны сүвүрүп эгелээнин мониторинг көргүскен.
Ажылдар график езугаар, штат чуруму-биле чоруп турар.
Материал-техниктиг баазазын чаартыры-биле чергелештир, техникумнуң башкылар составының мергежилин бедидер белеткелди организастаан. Чоокта чаа техникумнуң мастерлери республиканың билдингир даг-болбаазырадылга компаниялары: «Лунсин» КХН биле «Тываның даг-руда компаниязы» КХН-ге стажировкалааннар.
Стажировканың сорулгазы – профессионал арга-дуржулгазын хевирлээри болгаш сайзырадыры, практика кырынга профессионал билиглерин болгаш арга-дуржулгаларын быжыглаары, мурнакчы арга-дуржулганы шиңгээдири, ол ышкаш республиканың даг-руда адырынга мергежилдиг кадрларны белеткээриниң шынарын бедидери.
Техникум экономиканың боттуг сектору-биле кады ажылдааш, келир үениң тускай мергежилдиглеринге амгы бүдүрүлге негелделеринге дүгжүп турар чугула билиглерни шиңгээдип алыр арганы берип турар деп, Өөредилге яамызы дыңнаткан.
«Профессионалитет» федералдыг төлевилел-биле 2026 чылда Тываның агроүлетпүр техникумунуң 2 дугаар ниити чуртталга бажыңы база чаартынып эгелээрин сагындыраал. Санитарлыг болгаш техниктиг шупту негелделерни сагывышаан, чуртталга фондузунуң үндезин септелгезин кылып, ооң-биле чергелештир чугула дериг-херекселдер болгаш эт-септер-биле хандырары планнаттынган. Сургуулдарга таарымчалыг чурттаар байдалдарны тургузар.
