Расул Гамзатовтуң 100 харлаан оюнга тураскааткан очулга мөөрейи

2023 чылдың Тыва Республикада чарлаттынган Тыва дыл хүнүн сураглыг авар чогаалчы, прозачы, публицист, очулдурукчу Расул Гамзатовтуң 100 харлаан оюнга тураскаатканын Тыва үндезин культура төвү дыңнаткан.

Расул Гамзатов – Дагестанның патриотчу оглу, бедик мөзү-шынарлыг, тѳрээн чериниң чаныш-сыныш чок кижилерниң бирээзи. Ховар дээн салым-чаяанныг чогаалчы чонунга чечен сѳзүн ѳргүп, тѳрээн дылының, культуразының, чуртунуң сайзыралынга чаагай үлүүн киирген. Ооң чогаадыкчы ажыл-ижи чоннар аразында харылзааже, тайбың болгаш найыралче угланган чораан. Расул Гамзатовтуң чогаадыкчы өнчүзү салгалдар аразында харылзааны магадылап, ак сагыш, шынчы база тѳрээн чуртунга ынак чорукту алгап, чуртталганың кол ѳзээ ынакшылды болгаш найыралды карак огу дег хумагалаарын суртаалдап чоруур.

Сурагжаан чогаалчы Расул Гамзатовтуң 100 чыл оюнга уткуштур Тыва үндезин культура тѳвү ооң шүлүктерин тыва дылче очулдурар мѳѳрейни чарлап тур! Тыва Республиканың девискээринге тыва дылды болгаш тыва литератураны хөгжүдер база ооң байып хөгжүүрүнүң немелде курлавыры болур очулга ажылын сайзырадыр талазы-биле ажылды ук мѳѳрей-биле эгелеп алганывыс бо.

Очулдурукчуларның назы-харынга, кылып чоруур ажыл-ижинге, дооскан мергежилинге, чурттап чоруур девискээринге хамаарышкан чүүлдерге улуг негелделер салбайн, чаңгыс чер-чурттугларывысты идепкейлиг киржиринче чаладывыс!

Ноябрь 22-ге чедир ажылдарны хүлээп, ноябрь 23-те мөөрейге киришкен очулдурукчуларның ажылдарын жюри кежигүннери түңнээр, тергиин болган ажылды «Улуг-Хем агымы» сеткүүлүнге үндүрер.

Харылзажыр телефон дугаары: 2-35-54, e-mail: ctyva@yandex.ru