Федералдыг Чырыдыышын яамызының деткимчези-биле камгалап алганы чартык миллиард ажыг рубльге бо чоокку ийи чылда школаларга үндезин септелгелерни кылырын, Тываның Баштыңы Владислав Ховалыг бодунуң социал четкилеринде дыңнаткан.
Тываның Баштыңы регионда өөредилге инфраструктуразын хөгжүдеринге демниг кады ажылдажылгазы дээш, РФ-тиң чырыдыышкын сайыды Сергей Кравцовка база оралакчы сайыт Андрей Николаевка байырын чедирген.
Россияның Чырыдыышкын яамызының бадылааны санаашкыннар езугаар, 2024 чылда республиканың алды школазынга үндезин септелгени кылыр болза, 2025 чылда дөрт ниити өөредилге албан черлерин чаартыр.
«Өөредилге хөгжүлдези» күрүне программазы езугаар кылдынар эде чаартылга ажылдарының шугуму-биле, чедери берге суурларда база кожуун төптеринде 40 школаны чаарткан.
«Өөредилге хөгжүлдези» күрүне программазы-биле школаларның оран-савазын чаартырындан аңгыда, иштики дерилгезин кылып, уругларга-даа, башкыларга-даа таарымчалыг байдалдарны тургузар.
Федералдыг күрүне программазынга киржир чагыгны долдурар дээш, республикада улуг белеткел ажылын организастаан. Владислав Ховалыгның даалгазы езугаар, Тываның Өөредилге яамызы школаларның үндезин септелгезиниң төлевилел-санаашкын дөзевилел документилерин чагыыр ажылды кылган. Эрги бажыңнарлыг албан черлеринче онза кичээнгейни угландырган.
Тываның Баштыңы республиканың муниципалдыг тургузуглар удуртукчуларын чагыглар ажылдарынче хаара тудуп, көдээ школаларны чаартыр арганы бүрүн ажыглаарынче кыйгырган.
Федералдыг программа боттандырылгазы-биле бо чылын Тываның 13 школазын: Шагаан-Арыг хоорайның гимназиязын, Туран биле Ак-Довурак хоорайларның, Чал-Кежиг, О-Шынаа, Бүрен-Аксы, Сесерлиг, Дөң-Терезин, Тоора-Хем, Сарыг-Сеп, Булуң-Терек база Сосновка суурларның школаларын бүрүнү-биле чаарткан.
