«Өөредилге» национал төлевилел: Спортчу шөлдер ам-даа немежир

Бо чылын «Өөредилге» национал төлевилел езугаар «Уруг бүрүзүнүң чедиишкини» федералдыг программа-биле Тываның беш школазынга спортчу шөлчүгештерни тударын ТР-ниң Өөредилге яамызы дыңнаткан. Спортчу объектилерни Кызыл хоорайның 3, 8, 10, 11 дугаарлыг школаларынга база Аграр лицейиниң девискээринге тудары көрдүнген.

Национал төлевилелдиң күүселдези-биле республиканың 82 школазында күш-культура болгаш спорт кичээлдерин эрттиреринге таарымчалыг байдалдарны тургускан. Спорт шөлдерин туткан, спорт залдарының үндезин септелгелерин кылган, школаның спорт клубтары дериг-херекселдер-биле чартынган. Чаа спортчу дериг-херекселдерлиг болгаш чаартынган залдарда 20 муң ажыг школачыларда күш-культура кичээлдерин эрттирип, аныяк-өскен ортузунда кадык амыдыралды суртаалдап турар.

Эрткен чылын 11 көдээ школаның спорт шөлдерин чаарткан болгаш ийи спорт клувунуң дериг-херекселдерин саткан. Оон аңгыда Бии-Хем кожууннуң Туранда 1 дугаар школаның спорт залының үндезин септелгезин кылган.

Уруг-дарыг арыг агаарлыг чаартынган спорт шөлдерде бут бөмбүү, баскетбол, хол бөмбүүнде маргылдаалап, тренажерларда ойнап, чаа-чаа эш-өөрнү тып, хостуг үезин кадыкшылынга ажыктыг кылдыр эрттирип турарлар.