Өөредилге сайыды улусчу диктантыга идепкейлиг киржиринче кыйгырган

Тываның өөредилге сайыды Ирина Биче-оол Тыва дыл хүнүнге тураскааткан улусчу диктантыга идепкейлиг киржиринче чалаан.

Бөгүн республиканың күш-ажылчы коллективтеринге, албан черлеринге болгаш күзелдиг чурттакчы чон аразынга улусчу диктант 16.00 шакта болуп эртер. Диктантының сөзүглелин тыва дыл башкылары номчуур.

Тыва дылдың дугайында билиглерниң деңнелин хынаар, төрээн дылга чугаалажыр база ону өөрениринче кыйгырар сорулгалыг хемчегни Өөредилге яамызы болгаш Национал школа хөгжүдер институт эрттирип турар.

Диктантыны баш бурунгаар дугурушкан шөлчүгештерге бижиир. Улусчу диктантыга киржир күзелдиг улустарны "Аныяк" деп төпке 15.30-де манаарын сагындыраалы. Адрези: Кызыл хоорай, Кочетов кудумчузу, 51.