Тывада кыш эгезинден бээр халдавырлыг тыныш аарыындан аараан таварылгалар саны эпидемиологтуг деңнелден ажа бергени бир дугаар демдеглеттинген. Росхереглелхайгааралдың Тывада эргелелиниң удуртукчузу Людмила Салчак аппарат хуралынга сезоннуг аарыгларның байдалын илеткээн.
Албан чериниң дыңнатканы-биле алырга, декабрь 7-ниң хүнүнде Тывада респираторлуг вирустуг халдавырдан аараан ниитизи-биле 2583 таварылга бүрүткеттинген. Аарыгның деңнели 10 муң кижиге онааштыр 73 чеде бергени, эпидемиологтуг деңнелден 12,2 хуу бедик. Эрткен неделяга деңнээрге, эмчилерден дуза дилеп барган кижилер саны элээн өскен.
Респираторлуг вирустуг халдавырының эң улуг өзүлдези школа назыны четпээн уруглар болгаш школачылар аразынга болган – бо бөлүктерде эпидемияның деңнели 28,3 болгаш 39,4 хуу ажа берген. Хыналда хайгаарал органнарының болгаш эмчилерниң негелдези езугаар, элээн каш уруглар садтарында болгаш школаларда аарыгның тарап нептерээрин болдурбас хемчеглерни киирген.
Туран хоорайда ийи база Кызыл-Мажалык суурда бир – үш школаны ырактан өөредир хевирже шилчиткен. Кызыл хоорайның беш школазында, ол ышкаш Сөш, Эрзин, Мугур-Аксы суурларда – шупту беш школада кичээлдерни түр када соксаткан. Бии-Хем биле Бай-Тайга кожууннарның дөрт уруглар садтарында карантинни чарлаан.
Респираторлуг вирустуг халдавыр дээш эмчилерден дуза дилеп келген аарыг кижилерниң биоматериалдарын хынаарга, оларның чартыы грипптиң А вирузу-биле, тодаргайлаарга H3N2 хевири, азы Гонконг гриви-биле аарып турар болган. А чартыындан риновирусту тыпкан.
Ылаңгыя иммунитеди ам-даа сайзыраваан үш хар четпээн уругларга, 55 хардан өрү назылыг, хоочураан аарыгларлыг кижилерге база иштиг херээженнерге гонконг гриви онза айыылдыг деп, эмчилер сагындырып турар. Аарывас дизе, хөй кижилер чыылган черлерже баарын кызыгаарлап, камгалал масканы кедип, холдарны чуур. Эпидемиологтуг сезон бүдүүзүнде гриппке удур тарыдып алган улус аарыгны чиик эртер.
Республиканың эрге-чагыргалары база муниципалдыг тургузуглар респираторлуг вирустуг халдавыр эпидемиязының тарап нептерээрин болдурбазы-биле, элээн каш немелде хемчеглерни алыр ужурлуг деп, Людмила Салчак санап турар.
Массалыг хемчеглерни кызыгаарлап, камгалал маска чурумун киирип, «эртенги хыналдаларны» чорудуп, арыгланыр черлерлерни аштап-чүлгүп, албан черлериниң иштинге кижилер аразында харылзааны база эмнелгелерде чыдар кижилерже баарын эвээжедир деп тускай мергежилдиглер сүмелеп турар.