Тывада респираторлуг вирус халдавыры болгаш грипп аарыы эпидемияның деңнелинден 46,6 хуу куду. Тываның Чазааның аппарат хуралынга Росхереглелхайгааралдың Тывада эргелели эрткен неделяның ындыг сан-чурагайларын дыңнаткан. Эрткен неделя дургузунда республикада респираторлуг вирустуг халдавырдан 869, грипптен аараан 21 таварылга бүрүткеттинген.
Республикада социал болгаш өөредилге албан черлеринге аарыгларның тарап нептерээрин болдурбас дээш, хүннүң-не мониторингини чорудуп турар. Школа назыны четпээн уруглар албан черлериниң бөлүктеринде болгаш школаларның класстарында кээп турарының санын демдеглеп турар. Ындыг хыналда аарыыр чорукка удур чогуур хемчеглерни алырынга дээштиг.
Бии-Хем, Сүт-Хөл, Улуг-Хем кожууннарның өөредилге черлери амгы тургустунган эпидемиологтуг байдалды барымдаалап, хөй-ниити хемчеглерин кызыгаарлап, өөреникчилерни ырактан өөренир кылдыр түр када шилчидерин сүмелээн.
Тываның Чазак Даргазының оралакчызы Орлан Сарыглар бир эвес школада элээн хөй өөреникчилер өөренмейн турар болза, хөй-ниити хемчеглерин соксадып, ырактан өөредилгеже шилчиирин боттары шиитпирлеп болур дээрзин айыткан.
Бир эвес уруглар садында чаштарның 20 хире хуузу грипп азы респираторлуг вирус халдавырындан аараан болза, ол ышкаш 1-2 дегдирген таварылга илереттинзе, албан черин карантиннээр.
Школаларга хамаарыштыр алырга, уругларның 20 хуузу аарып, дегдирген 1-2 таварылга илереттинер болза, класска кызыгаарлаашкын хемчеглерин киирер. Бир эвес респираторлуг вирус халдавырының уржуундан өөреникчилерниң 30-ден хөй хуузу өөренмейн баргаш, 8-10 хире дегдирген таварылгалар бар болза, бүдүн школага карантинни чарлаар.
«Бир эвес хоорай школаларының чартыы хирезинде өөреникчилерниң 30 хуузу грипптээш өөренмейн турар болза, шупту ниити ортумак өөредилге черлеринге карантинни киирер шиитпир хүлээп алдынар. Чамдык таварылгаларда чүгле аараан уругну карантинче чорудар» – деп, Росхереглелхайгааралдың Тывада эргелели дыңнаткан.
Сөөлгү неделяларда соок дыңзып, школачыларның аразында харылзаа көвүдээнинден регионга респираторлуг вирустуг халдавырның сезоннуг көдүрлүүшкүнү эгелээр ужурлуг. Ол чүүл кадык камгалал системазынга немелде ажылдарны тургузуп, уругларның кадыкшылын камгалаар дээш ырактан өөренир хемчегни киирерин сүмелээр.
