Республикада үжен муң ажыг уругну изиг чем-биле хандырып турар

Тывада 2021-2022 өөредилге чылында республиканың школаларының эге класс өөреникчилери – 30515 уругну изиг чем-биле хандырып турар.

Тыва Республиканың өөредилге сайыды Алексей Храмцов Кызыл хоорайның школаларын изиг чем-биле хандырып турар хуу бүдүрүлгелерниң ээлери-биле ажылчын ужуражылганы эрттирген. Найысылалда 1-4 класстарның 12899 өөреникчизин халас изиг чем-биле хандырып турар.

Ужуражылга үезинде сайгарлыкчыларның чем кылып турар черлериниң материал-техниктиг баазазының, уругларның чемненир черлериниң чедишпезиниң, чемниң менюзунуң чаңгыс аайының, чигир аарыглыг, аллергиялыг болгаш оон-даа өске аарыглыг уругларга таарыштыр чем кылыр системаның чогунуң дугайында айтырыгларны сайгарып чугаалашкан.

Бо чылын федералдыг бюджеттен уругларның изиг чем-биле хандырылгазынга 393,6 сая рубль хемчээлдиг саң-хөө акша-хөреңгизин аңгылаан.