Республиканың орук четкизин хөгжүдер беш чылдың планы

Тываның Баштыңы Владислав Ховалыг биле Росавтоорук федералдыг орук агентилелиниң удуртукчузу Роман Новиков республиканың девискээринде регионнуң, азы муниципалдар аразының болгаш тус черниң автомобиль оруктарын хөгжүдер дугайында саавырда атты салганнар.

– Тываның Чазаа биле Федералдыг орук агентилели бо меморандумга атты салгаш, орук ажыл-чорудулгазының адырында, ол ышкаш Тыва Республиканың орук четкизин хөгжүдер беш чылдың планында хемчеглерни боттандырарынга кады ажылдажылгазын быжыглап турар.

Республиканың чугула четкизи болур кызыгаарлар аразының оруун алызы барып хөгжүдүп, Азия – Оожум океан регион чурттар уунче транспорт аргыжылгазын калбартыры – документиниң кол өзээ ол –деп, Тываның Баштыңы демдеглээн

Орук ажылын чорудар программаны боттандырар беш чыл планы езугаар, 2027 чылга чедир республиканың хоорай оруктарының 85 хуузун база регион оруктарының 62,3 хуузун нормага дүүштүр кылыр. Тываның Баштыңы республика салдынган сорулганы күүседиптеринге бүзүрелдиг, чүге дизе ажылдар чогуур темп-биле чоруп, амгы планын бо чылын каш катап ажыр күүседипкен. «Элээн мурнап турар бис. Чыл дургузунда аңгы-аңгы участоктарда 30 километр оруктуң шынарын экижиттивис» – деп, Владислав Ховалыг бодунуң блогунда бижээн.

Беш чылдың планында Кызыл кожууннуң Баян-Кол сууру-биле транспорт аргыжылгазын хандырар Улуг-Хемни кежир көвүрүг тудуу база үш автомобиль оруктары бар.

Оон аңгыда Копту-Аксы – Тоора-Хем автомобиль оруунда элээн каш участоктарны, Бүрен-Аксы – Элегес-Аксы – Кунгуртуг аразында чүгле кышкы үеде ажыглаар 253 километр автоорукту бүдүн чылда ажыглаар кылдыр кылыры, Тываны Алтай база Новосибирск облазы-биле тудуштурган «Енисей» Р-257 биле «Чуй оруу» Р-256 федералдыг автоорукта орукту 300 хире километрге кызырган Кызыл-Хая (Тыва Республика) – Кош-Агач (Алтай Республика) аразында 130 километр участокту тудары көрдүнген.

Ол ышкаш Ак-Довурак – Абаза автоорукта аварийлиг байдалда келген 19 көвүрүг кежиглерин экижидир кылыры беш чылдың планында кирген.