Республиканың үжен муң хире чурттакчызы саргы энцефалидинге удур тарыдар

Тывада саргы энцефалидинге удур тарылганы шапкынчыткан. Росхереглелхайгааралдың Тывада эргелелиниң медээзи-биле алырга, сес муң хире кижини тараан, 12,5 муң кижи катап тарылганы алган. Ажыл-амыдыралының аайы-биле ондактыг бөлүкче кирип турар дөрт муң хире кижи тарыткан. Бо чылда республиканың 27736 чурттакчызын, ооң санында 968 уругну тарыыры планнаттынган.

Саргы энцефалидинге удур тарылганың долу курузун алырда, 1-2 ай болгаш-ла үш катап тарыдар, баштайгы ийи тарылганың соонда 12 ай эрткенде үшкү тарылганы кылыптарга, долу курс салдынган болур болгаш, үш чыл болгаш-ла катап тарыышкынны эгелээр.

Апрельде республика девискээринде кижилер хөй чыглыр болгаш дыштаныр черлерни саргыга удур арыглап, хораннап эгелээр. Эрткен чылга деңнээрге арыглаар шөлдер девискээри 5,5 хуу улгаткан. Ниитизи-биле 443 гектар черни арыглаары планнаттынган.

Чайгы дыштанылга кампаниязының бүдүүзүнде уруглар тарылгазынче онза кичээнгейни углап, чайгы кадыкшылга лагерьлериниң девискээрин саргыга удур арыглап, хораннаарын хыналдага алырын муниципалиттер удуртукчуларынга сүмелээн.

Дөрт хардан өрү назылыг уругларны база айыылдыг бөлүкке хамааржыр улуг кижилерни халдавырлыг саргы энецефалидинге удур тарыырын республика бюджединден акшаландырарын сагындыраал. Айыылдыг бөлүкче арга-арыг болгаш көдээ ажыл-агый, камгалал болгаш өртке удур албан черлериниң ажылдакчылары, аңчылар, зоология болгаш биология башкылары, чайгы кадыкшылга организацияларының тускай мергежилдиглери, гидрометеорологтар, автооруктар тудугжулары кирип турар. Регионнуң эпидемиологтары бойдус байлаан чыып турар хамаатыларны бо чылдың тарылга планынче киирерин саналдаан.

Кызыл хоорайда Лопсанчап кудумчузунуң 15 дугаар бажыңында «Мир здоровья» аптекадан (тел. 8(394-22) 6-35-91), Калинин кудумчузунда 8 дугаар бажыңда «ФЭУ» аптекадан (тел: 8 (394-22) 6-41-43) саргының халдавырлыг энцефалидинге удур вакцинаны боттары база садып ап болур. Вакцинаның өртээ – 470 хире рубль.