Росавтооруктуң эксперттери Тываның оруктарын хынап турар

Тывада күштүг суг үерлээшкининден үрелген Ак хемни кежир көвүрүг чоогунда, «Ак-Довурак – Абаза» автоорук участогу-биле шимчээшкин катап эгелээн. Түр үениң кежии тавартыр Тыва биле Хакасияның аразында ол оруктап аргыжылга тургустунган.

«Р-257» федералдыг оруктап Кызылдан кожа-хелбээ Хакасияже орукче үе-даа, акша-даа хөй үнер, ынчангаш түр үениң оруун дүрген ажыдар херек» – деп, Тываның Баштыңы Владислав Ховалыг социал четкилерде бодунуң блогунда бижээн. Оюп кежер орукту кончуг дүрген кылганы дээш, Тываның Орук-транспорт яамызының база орук албан черлериниң ажылдакчыларынга четтиргенин илереткен.

Автооруктуң үрелген участогунда быжыглаашкын ажылдары бөгүнде база уламчылап турар. Республика удуртукчузунуң чугаазы-биле алырга, суггур чаъстаашкындан база хем дажаанындан үрелген ол көвүрүгнү катап кылырынга элээн хөй акша-хөреңги херек.

Владислав Ховалыгның дилээ-биле тургускан ажылчын бөлүктүң составында Росавтоорук федералдыг орук агентилелиниң эксперттери республиканың автооруктарда үрелген участоктарны болгаш объектилерни бо хүннерде хынап чоруп турар. Тускай мергежилдиглер ам-даа бир неделя ажылдаар.

Тываның Баштыңы республиканың Экономиктиг хөгжүлде яамызы болгаш Тарифтер албанынга көвүрүг үрелгенинден Барыын-Хемчиктиң садыг черлеринде аъш-чем аймаанга база кывар-чаар чүүлдерге өртектер өстүргенинге хамаарыштыр мониторинг чорудар даалганы берген. Ооң түңнели-биле чогуур хемчеглер алдынар.