«Росчетки» чаа транзит шугумунга «Туран» дузалал станцияны кожар дээш эде чаартылга ажылдарын кылыр

РФ-тиң Чазааның даргазының оралакчызы Александр Новактың бадылааны, Тыва Республиканың девискээринде үлетпүр болгаш социал адырларда энергетика хандырылгазының комплекстиг планы-биле республиканың төп болгаш чөөн кожууннарында чырык энергиязын хандырып турар 220 кВ-тыг «Туран» дузалал станцияны эде чаартыр.

Амгы үеде ажылдап турар энергия объектиниң чанынга, Красноярск крайдан чаа транзит шугумун кожар сөөлгү үениң хандырылга төвүн тудары көрдүнүп турар. Чырык күчүзүн улгаттырганы Ак-Сугнуң полиметалл рудазының чыдынын дүрген шиңгээдиринге, ниитизи-биле 130 муң чурттакчылыг Кызыл база Тожу кожуунну хөгжүдеринге идигни бээр.

Тываның Баштыңы Владислав Ховалыг республиканың девискээринде инвестиция болгаш социал объектилерниң чырык хандырылгазының комплекстиг планын боттандырар ажылдарның күүселдезин бодунуң хыналдазында алган.

220 кВ-тыг «Туран» дузалал станцияга чаа тудуп турар 220 кВ-тыг «Шушенская-кол – Туран» чырык шугумун (узуну – 238 км) кожары планнаттынганын «Росчетки» дыңнаткан. Ол ышкаш энергетиктер Красноярск крайның мурнуу талазында кол хандырылга төвү – 220 кВ-тыг «Шушенская-кол» дузалал станцияны калбартыр. Ооң ажылдарының ниити өртек-үези – 25 млрд ажыг рубль.

«Туран» дузалал станцияның эде чаартылгазында 50 МВА күчүлүг күштүг дериг-херекселдер, релелиг камгалалдыг микропроцессор комплекстери, четкиде токтуң күчүзүн өйлээр реактивтиг күштүг компенсация дериглери-биле чепсегленген чаа энергетика объектизин тудары көрдүнген, деп компания тайылбырлаан.

220 кВ-тыг «Туран» дузалал станция Тывада Бии-Хем кожууннуң Туран хоорайның чоогунда турар. Амгы үеде ында 220 кВ-тыг ийи шугум – Красноярск крайның 220 кВ-тыг «Ергаки» дузалал станциязы биле Тываның кол хандырылга төвү – 220 кВ-тыг «Кызылская» дузалал станция коштунган. Алызында барып 220 кВ-тыг «Шушенская-кол – Туран» чырык шугумун 220 кВ-тыг «Туран – Туманная» чырык шугумунуң объектизинге кожар. 312 километрге шөйлү бээр ук шугумнуң тудуу чоруп турар.

Владислав Ховалыг ол планның күүселдези регионга мультипликативтиг социал-экономиктиг магадылалды бээрин чаңгыс эвес катап демдеглээн. Тускай мергежилдиглерниң санап турары-биле алырга, 2030 чылга чедир регион 250 млрд ажыг рубль инвестицияларны хаара тудуп, 10 муң ажыг ажылчын олуттарны ажыдар. Республиканың үлетпүр бүдүрүлгезиниң хемчээли 73 млрд рубльге көвүдеп, а регионалдыг бюджетче немей 36,5 млрд рубль кирер.