Росгвардия ажылдакчыларының болгаш тускай шериг операциязының киржикчилериниң өг-бүлелерин школа назыны четпээн өөредилге албан черлеринге ада-ие төлевиринден хостаан.
Тываның Баштыңы Владислав Ховалыг республика чазааның хуралынга, тускай шериг операциязынга киржип турар шериг албан-хүлээлгелиглерниң өг-бүлелеринге социал деткимче хемчеглерин тодарадыр болгаш калбартыр угланыышкынныг доктаалды хүлээп алганын дыңнаткан. Ол документиде Россия Федерациязының Национал гвардиязынга шериг албанын эрттирген азы эрттирип турар хамаатыларга база тускай шериг операциязының киржикчилеринге школа назыны четпээн уруглар садтарында уругларны ажаап-карактааны дээш ада-ие төлевирлеринден хостаар эргени быжыглаан.
Тускай шериг операциязының шупту киржикчилериниң өг-бүлелери уруглар садынче барып турары дээш ада-ие төлевиринден хостаан чиигелдени киирген. ТР-ниң Өөредилге яамызының дыңнатканы болза, бо хүнге чедир ол деткимчени 2528 уруг алган, ооң иштинде чок болган тускай шериг операциязының киржикчилериниң 211 ажы-төлү. Бо чиигелдениң эң хөй алыкчылары Кызыл хоорайда (1456 уруг), Кызыл кожуунда (201 уруг), Улуг-Хемде (132 уруг) чурттап турар.
Тускай шериг операциязының киржикчилериниң ажы-төлүн хайгаарап-карактааны дээш ада-ие төлевирлеринден хостаарының чурумунче киирген өскерилгелер езугаар, чиигелде алыкчыларының даңзызынче амгы үеде РФ-тиң Национал гвардиязында шериг албанын эрттирип турар азы эрттирген база тускай шериг операциязында киржип турар ада-иелерни киирген.
Шеригжи чок апаар болза, бо чиигелдени база алыр. Ону алыр дизе, ажыл албанын болгаш тускай шериг операциязынга киржилгезин бадыткаан документиниң хоолгазы кирген бөлүк документилерин дужаар.
Тываның Баштыңы бо чылдың эгезинде ТР-ның Дээди Хуралынга Айыткалында тускай шериг операциязының киржикчилериниң өг-бүлелерин школа назыны четпээн өөредилге албан черинче барганы дээш төлевирден хостаар дугайында саналды кииргенин чарлаан турган.
Росгвардияның Тывада эргелелиниң ажылдакчылары тайбың чоннуң айыыл чок чоруун хандырарынче, террор болгаш экстремисчи чорук-биле демисежиринче, хөй-ниити корум-чурумун камгалаарынче, девискээр камгалалын тударынче, ол ышкаш Россия Федерациязының күрүне кызыгаарын камгалаар талазы-биле кызыгаар органнарынга деткимче көргүзерин хандырарынче угланган тускай шериг операциязының девискээринде дыка хөй ажылдарда киржип турар. Оон аңгыда, росгвардейжилер одалга-энергетика комплекизиниң болгаш өске-даа чугула объектилерниң айыыл чок чоруун хандырып турар.
