Токиога 2021 чылда болган Олимпий оюннарның чемпиону, Делегейниң 2 дакпыр чемпиону (2018,2019), Россияның алдарлыг спорт мастери Заур Угуев (Дагестан) соңгузуу хүн, июнь 23-те Кызылга эгелээр хостуг хүрешке Россия чемпионадынга киржип чедип кээр деп билдинип келген.
Ам болур чемпионатка киржир чаңгыс борбак Олимпий чемпиону болур Заур Угуев маргылдааны каастаар-даа болза, ол мөге сөөлгү чылдарда тыва мөгелерге орук бербейн, оларга ажыы-биле чугаалаарга «доора чудук» апарган деп чүвени утпас болзувусса эки.
Ону дараазында факт-барымдаалар-биле бадыткап турар:
2018 чылда Москва облазының Одинцово хоорайга болган Россия чемпионадынга Заур Угуев финалда бистиң мөгевис Хүреш-оол Дондук-оолду ашкаш, Россия чемпиону болган. Финалга чедир 5 удурланыкчызын тиилээн тыва мөге ынчан мөңгүн медальга төлептиг болган.
Улаштыр Заур Угуев ол-ла чылын Будапешт хоорайга (Венгрия) болган Делегей чемпионадының финалынга Казахстан дээш хүрежип чоруур мөгевис Артас Санааны (казах ады Нурислам Санаев) база ашкаш, бодунуң спортчу допчу-намдарында бир дугаар Делегей чемпиону атты чаалап алган. Тыва мөге ынчан база-ла мөңгүн медальга төлептиг болган.
Дараазында,2019 чылда, Казахстанның найысылалы Нур-Султан хоорайга болган Делегей чемпионадының финалынга Заур Угуев биле Артас Санаа ам база катап таваржып кээрлер ирги бе манаашкынывыс бүтпейн барган. Артас ынчан чартык финалда түрк мөге Сүлейман Атлыга ойнадыпкаш, Заур Угуев-биле база катап финалга хүрежир арга-шинээн чидирип алган.
Будапештке болган финалга Артаска баштай сан талазы-биле аштырып чоруп тургаш, сөөлүнде судьяларның будулгаазынныг шииткелиниң дузазы-биле бистиң мөгевисти ашкаш, Делегей чемпиону болган Заур Угуев Нур-Султанга база аңаа финалга таваржып кээринден сестип турганы чугаажок. Ынчалза-даа финалче түрк мөге Сүлейман Атлы үнүп кээрге, Заур ону улуг бергедээшкин чок ажып алгаш, база катап Делегей чемпиону болган. Артас ынчан 3 дугаар чер дээш салыгда серб мөге Стеван Мичичти тиилээш, хүлер медальды чаалап алган.
Эрткен чылын Бурятияның найысылалы Улан-Удэ хоорайга болган Россия чемпионадының 57 кг чедир чиик деңзиге финалынга Заур Угуев ам база катап тыва мөгеге таварышкан.Бо удаада аныяк мөгевис Начын Монгуш база Угуевти сан талазы-биле ажып чоруп оргаш, салыгның сөөлүнде аштырыпканы кончуг хомуданчыг болган. Ынчалдыр Заур Угуев Россияның чемпиону болгаш, Токио Олимпиадазынче путевканы база чаалап алган. Токиога ооң Олимпий чемпиону болганы ам төөгүже кире берген.
Заур Угуев-биле тыва мөгелерниң удур туржуушкуну амдызыында тываларга чедимче чок болуп турар-даа болза, черивис-чуртувуска, тывалап «өдээвиске» болур Россия чемпионадынга тыва мөгелер ону черле ажып алырының арга-шинээ хам-ламалар дузазы чокка-даа, турар ужурлуг. Чогум хамнарга, ламаларга дүңгүрледип, улуг ном номчудуп алганы база черле артык эвес турган боор.
Мерген КЫРГЫС.
Чурукту интернеттен алган.
#Хостуг_хүреш_Россия_чемпионады_Тыва #мөгелер_Угуев #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
