“Россия” делегей чергелиг делгелге-шуулганга тыва куда езулалын эрттирер

Эртен, ноябрь 21-де, “Россия” делегей чергелиг делгелге-шуулганга Тыва Республиканың хүнү болуп эртер.

Делгелгеге келген улус “Көшкүн чоннуң октаргайы” деп концертти сонуургап көөр аргалыг болур. Тываның чогаадыкчы коллективтери чыылганнарга солун оюн-көргүзүүн бараалгадыр.

Ол хүннүң база бир солун хемчеглерниң бирээзи – “тыва куда”. Тывадан Москвада өөренип турар аныяктар Начын Күнзен-оол биле Белекмаа Ондар өгленишкен байырлалын эрттирер. Олар чаңгыс чер чурттугларын куда езулалынче чалап турар.

Аныяктарның куда-дою өгбелерден дамчып келген тыва езу-чаңчыл езугаар болур – «дүгдээри», «уругга селик чыыры», «думаалайын ажыдары», чырыктажыры, ужа сунуп хүндүлежири дээш шуптузун сагыыр.

Чалаткан аалчылар куда-дой үезинде аныяктарга йөрээл сөстерни чугаалап, чагыг-сүмезин бээр. Куданың сценарийин В. Көк-оол аттыг Национал театрның репертуарындан “Чавагазын салбактаңар” деп шииге үндезилеп тургускан.

Москвада Тываның төлээ черниң деткимчези-биле бо аныяктар аас-кежиктиг өг-бүле туткан байырлалын “Россия” “Россия” делегей чергелиг делгелге-шуулган үезинде эрттирер аргалыг болган.