«Россия» Национал төпке III бүгү-российжи куда фестивалынга Тывадан өг-бүле база киржир

Кызылдан Александр Ооржак биле Валерия Доюндуп чурттуң бүгү булуңнарындан келген 100 ажыг өг-бүлениң аразынга куда езулалы – «Россия. Чүректерни каттыштырган» деп III бүгү-российжи куда фестивалынга барып киржир.

Улуг хемчээлдиг байырлал езулалы Өг-бүле, ынакшыл болгаш шынчы чорук хүнү – июль 8-те, Москвага «Россия» Национал төпке болуп эртер. Фестивальга киржир дугайында билдириишкинни russia.ru/wedding сайтыдан киирип болур.

Александр биле Валерия машиналарын септедип тургаш, дугуй эптээр чер чанында кафеге таныжып алганнар. Хостуг столдар чок болганындан Александр Валерияның чөпшээрели-биле ооң чанынга олуруп алган. Эгелээн чугаа чоорту улуг ынакшылче шилчээн. Ужуражырының мурнунда Валерия ийи ажы-төлдүг – оол биле кыстыг, а Александр оолдуг турган. Олар чоокта ниити уругланган, удавас база бирээзин манап турар. Улуг өг-бүлениң кежигүннери хостуг үезинде даштыгаа дыштанып, спорт-биле ойнап, кады кино көөрүнге ынак. Олар улуг бажың садып алырын, солун аян-чорук кылырын күзеп, ажы-төлүн өөредир планнарын тургузуп турарлар.

«Өг-бүле дээрге эң-не чоок, эң-не бүзүрелдиг, чылыг хамаарылгалар-дыр. Ынакшаан кижилер аас-кежиктиг болур дээш бот-боттарынга дузалажып, ажы-төлдү кады өстүрүп, улгаткыже оларны деткип чоруурлар. Өг-бүлевиске чоргаарланып, бүгү чурттан аныяктарны чыгган «Россия. Чүректерни каттыштырган» деп III бүгү-российжи куда фестивалынга киржир бис. Бистиң кудавыс уттундурбас болуушкун апаарынга кайгамчык арга тургустунган деп санап, өөрүп тур бис» – деп, Александр биле Валерия чугаалаан.

Июль 8-те «Россия» Национал төпке фестивальдың бирги хүнүнде, бүгү чурттан ынакшааннарга хары угда бадылажылга езулалын эрттирери – кол болуушкун апаар. Ынакшылдың байырлалы «Россияның чүрээ» деп бүгү-российжи өг-бүле одааның оду-көзүн дамчыдары-биле онзаланыр. Чаа өгленген аныяк өг-бүлелер эрткен чылдарда өг-бүле байырлалдарда өгленишкеннерниң өг-бүлениң ыдыктыг камгалакчылары Петр биле Февронияның чурттап чораан Муромда бажыңындан одагның кезээн алырлар.

Июльдуң 9-та, ийиги хүнүнде, чаа өгленген өг-бүлелерге, оларның аалчыларынга база куда-дой темазынга сонуургалдыг кижи бүрүзүнге өөредиглиг лекциялар болгаш кулинарлыг программаны эрттирер.

«Россия» национал төптүң организастааны фестивальды Москваның Чазаа болгаш Москваның хамааты байдалдың актылар бижидилгезиниң эргелели-биле кады эрттирер.