Тывага «Россияда ажыл. Арга-шинектер үези» деп бүгү-российжи ажылчын олуттар ярмарказының регионалдыг чадазы доозулган. «Кадрлар» национал төлевилелдиң 2023 чылда эгелээн бо хемчээ бүгү чуртта ажыл дилеп турар улус биле ажыл берикчилериниң аразында харылзааны тударынга дузалап турар.
Бо чылын ярмарка эки үре-түңнелди база катап көргүскен. Бүгү республикадан аңаа муң ажыг кижи киришкен. Ярмаркада 309 ажыл берикчизи 1300 ажыг хостуг ажылчын олуттарны сүмелээн. 628 кижи ол-ла черинге ажылче чалалгаларны алган. Эрткен чылын ындыг саналдар саны 563 турган.
Ярмаркага кижи ажыл дилээринден аңгыда, тодаргай тайылбырны база алыр. Ажыл дилээриниң база депшип ажылдаарының черлери, тускай шериг операциязының киржикчилеринге болгаш оларның өг-бүлелеринге аңгы шөл, улуг ажыл берикчилериниң ажылдар сүмелээн булуңу, школачыларга болгаш аныяктарга өөредилге шөлдери ажылдаан.
«Ажыл дилеп келген кижилер күрүнениң деткимче хемчеглериниң дугайында база «Россияга ажыл» деп порталда бо хүнде саналдаан ажылдар-биле таныжып болур. Тускай шериг операциязының хоочуннарынче болгаш оларның өг-бүлелеринче онза кичээнгейни угландырган бис. Амгы үениң чугула мергежилдерин сүмелээн база профугланыышкын ажылын чоруткан аныяктарга аңгы шөл база бар» – деп, Тываның Чазак Даргазының оралакчызы Орлан Сарыглар чугаалааш, а күш-ажыл ярмарказы чүгле хостуг олуттарны саналдаарындан аңгыда, ажыктыг медээлер алыр арга-дыр деп демдеглээн.
«Ада-чурт камгалакчылары» фондунуң регионалдыг салбыры бо хемчегге идепкейлиг ажылдап, 100 ажыг тускай шериг операциязының хоочуннарын болгаш чок болган база ис чок читкен дайынчыларның өг-бүле кежигүннерин хүлээген. Олар улуг компаниялар төлээлери-биле баштайгы чугаажылганы эрткен.
Фондунуң салбыр удуртукчузу Мерген Кызыл-оол хоочуннарны ажылга хаара тударын мурнады шиитпирлээр дээш ажыл берикчилери-биле чугаалажып, чиигелделер болгаш деткимче хемчеглер дугайында тайылбырны боду чоруткан. Оон аңгыда өөредилге черлеринче чиигелделиг кирер аргалар дугайында база киржикчилерге тайылбырлаан.
«Бистиң хоочуннарывыс болгаш оларның өг-бүлелери мындыг хемчеглерге идепкейлиг киржирин чедип алыр дээш кызыдып турар бис. Ярмарка шынап-ла хөй кижилерге ажыл тып алырынга, оларга херек деткимчени бээринге дыка дузалыг» – деп, Мерген Кызыл-оол чугаалаан.
Ам июнь 26-да республикага «Россияда ажыл. Арга-шыдал үези» деп бүгү-российжи күш-ажыл ярмарказының федералдыг чадазы болуп эртер, аңаа күш-ажылче ажылга хаара тударың кедилиг саналдары база турар.