Россияда кадрлар төптериниң үш тергииннериниң санынче Кызылдың чонну ажылга хаара тудар төвү кирген

Чонну ажылга хаара тудар адырда IV Бүгү-россия чергелиг профессионал мергежил мөөрейинге Тыва Республиканың Кызылдың ажылче хаара тудар төвү «1-ги деңнелдиң ажылче хаара тудар тергиин төвү» деп номинацияга үшкү черни ээлээн.

Тываның Баштыңы [id360104045|Владислав Ховалыг] кадрлар албанының ажылдакчыларының чедиишкинин дыңнадып, бо мөөрейге тиилелге чүгле коллективтиң ачы-хавыяазынга үнелел эвес, а регионда чонну ажылга хаара тудар албанның моон соңгаар хөгжүлдезинге идиг-дир деп демдеглээн.

«Россияда ажыл» деп чаңгыс ылгавыр демдек-биле ажылдап турар кадрлар төптери регионнарда эде чаартынган чонну ажылга хаара албан черлеринде ажылдап турар. Тываның чонну ажылче хаара тудар төвүн 2023 чылда эде тургузуп, чонну ажылга хаара тудар 15 төптү чаартып, ол ышкаш Чонну ажылче хаара тудар башкарыкчы төптү ажылдаткан. Бөгүн бистиң тускай мергежилдиг ажылдакчыларывыс чугула айтырыгны шиитпирлеп турар – хамаатыларга ажыл тып алырынга дузалажып, бодунуң профессионал арга-курлавырын ажыглаар арганы берген. Оларның кызымаккай күш-ажылы болгаш ажыл-херээнге бердингени бүгү-российжи деңнелинге бедик үнелелди алганы өөрүнчүг-дүр» – деп, регион баштыңы бодунуң блогунда бижээн.

2023 чылда комплекстиг эде чаартылга соонда, республиканың кожууннарында чонну ажылга хаара тудар территориалдыг килдистер «Кадрлар» национал төлевилел күүселдези-биле кирген чаа чурагай аргаларын ажыглап тургаш, чаңгыс аай стандарт езугаар ажылын эгелээн.

Чонну ажылга хаара тудар төптерниң офистеринде келген кижилерге эптиг болзун дээш манаарынга эптиг девискээрни аңгылап, амгы үениң эт-севин салып, чурагай ачы-дузаларын чедингир кылып, уруглар ойнаар шөлдерни дерээн. Оран-саваларның даштыкы болгаш иштики хевирин «Россияда ажыл» деп аңгылаттынып турар аян-биле тускайлаан.

Чаартылгаларның бирээзи – төптер хамааты кижиниң амыдырал-чуртталгазын көрүп азы ажыл берикчизиниң бизнес байдалынга таарыштыр комплекстиг болгаш адрестиг ачы-дузаларны көргүзүп турар. Ынчангаш, ажыл дилекчилери-биле депшилге, а ажыл берикчилери-биле кадрлар консультантылары ажылдаар. Олар кижи бүрүзүнге таарыштыр кылган планга даянган шиитпирлерни саналдаар.

Ындыг арга-хевирни ажыглаалының түңнелинде, Тывада «Россияда ажыл» кадрлар төвүнден ажыл дилеп турар кижилерниң ажылче хаара тударының көргүзүү 72,7 хуу чедир өскен, а ажыл чоктар учедунга турар хуусаа 94 хонук чедир, азы 44,2 хууга кызырылган. Ажылче хаара тудар төптен дуза дилээн хамаатыларны ажылче хаара тударының ортумак үези 101 хонук чедир кызырылган, эде чаартылга мурнунда 2022 чылдың көргүзүүнден ол 38 хуу эвээш.

Тывада «Россияда ажыл» кадрлар төвү 2025 чылдың тос айында билдириишкин киирген 8765 хамаатының 6078-ин ажылга тургустунарынга дузалаан.

Ол үе дургузунда ажылга хаара тудар төптерниң специалистери 764 муң ажыг профугланыышкын консультациязын болгаш хемчегни эрттирген. Ачы-дузаның үштүң бирээзи-ле 30 хар четпээн аныяктарны деткииринче угланган.